Ayni kunlarda viloyatimizda bahorgi obodonlashtirish va ko‘kalamzorlashtirish ishlari jadal sur’atda amalga oshirilmoqda. Mahallalar, ko‘chalar va jamoat hududlarini yanada ko‘rkam qilish maqsadida keng ko‘lamli ishlar olib borilmoqda.

Bugun Surxondaryo viloyati hokimi Ulug‘bek Qosimov Termiz shahrining markaziy ko‘chalarida obodonlashtirish, "yashil" hududlar barpo etish va mavjudlarini parvarishlash ishlari hamda avvalgi o‘rganishlarda berilgan topshiriqlarning ijrosi bilan tanishdi. Shuningdek, Termiz xalqaro aeroporti hududi hamda unga olib boruvchi yo‘l bo‘ylab amalga oshirilayotgan obodonlashtirish ishlari ko‘zdan kechirildi.

Shundan so'ng, Termiz, Angor va Jarqo‘rg‘on tumanlaridan o‘tuvchi xalqaro va davlat ahamiyatidagi yo‘llar bo‘yida yaratilgan "yashil" belbog‘larni parvarishlash, qo‘shimcha daraxt ko‘chatlari ekish va maydonlarni tozalash ishlarining holati o‘rganildi.

Mutasaddilarga bu ishlarga alohida e’tibor qaratish, ularni sifatli tashkil etish hamda har bir hududning ozodaligi va obodligiga mas’uliyat bilan yondashish vazifalari yuklatildi.

Viloyat rahbari shuningdek, Angor tumanida aholining tomorqalardan samarali foydalanish tajribasi va yetishtirilgan mahsulotlarni eksportga yo‘naltirish jarayonlari bilan ham tanishdi.

Surxondaryo.uz | Telegram | Facebook | Instagram | YouTube | X