indamayman…
ammo, to‘g‘ri-da,
hammasi ham,
sen xohlagandek
men xohlagandek
bo‘lmaydi-ku.
hayot —
bizga yoqish uchun
yaratilmagan…
Indamayman.
mendan ketasanmi
sendan ketamanmi
bir balolar bo‘lmaydimi.
indamayman.
Vatan ham
uning siyosati
iqtisodiga qo‘shib
bir balolar bo‘lmaydimi.
Indamayman.
mening mitti adabiyotim
o‘lib ketmaydimi.
indamayman.
bu olamni qara —
oh!
yerning samoda muallaq
turishiga qara!
indamayman.
sabrimning
eshiklar ostonasida
ruhimning
yuraklar ostonasida —
muallaq
turishiga qara!
Oh!
indamayman.
bir insonning
baxtsiz tug‘ilib
baxtsiz o‘limini ko‘rsangchi.
indamayman.
yulduzlar
bir yaralib
bir portlashiga qara.
indamayman.
koinotdan boshlab
tirnoqning ichigacha
dard…
indamayman!
iltimos,
kel
indamaganim haqqi
quchoqla meni…
quchoqlashib
indamay turgim kelyapti…
Ahmad Ali Dilmurod
