СЕВАРА Убайдуллаева

Президент раҳбарлигида таълим бўйича муҳим йиғилиш бўлиб ўтди

2025 йил 15 май куни Президент Шавкат Мирзиёев раислигида мактаб таълими тизимидаги ислоҳотларни янада такомиллаштириш ва келгусидаги устувор вазифаларни белгилаш бўйича йиғилиш ўтказилди, йиғилишда охирги етти йилда мактабгача ва мактаб таълими учун ажратилган маблағлар бир неча марталик даражада оширилганлиги, шунингдек жорий йилда ушбу соҳаларга 60 триллион сўм йўналтирилиши алоҳида этироф этилди.
Шу билан бирга, мақсадли ислоҳотлар натижасида мактабларда 1 миллион, боғчаларда 1,5 миллионга яқин янги ўринлар яратилди, бунинг самараси ўлароқ мактабгача таълим қамрови эса 78 фоизга етди.
Ўқитувчиларни рағбатлантириш мақсадида 10 дан ортиқ устама жорий қилинди ва бу орқали 60 минг ўқитувчи 8 миллион сўмдан 12 миллион сўмгача маош олаётганлиги ҳамда боғча тарбиячиларининг ойлиги 65 фоизга оширилиб, мактаб ўқитувчилари билан тенглаштирилганлиги ҳам аниқ ҳақиқатдир.
Мазкур йиғилишда таълим сифатини оширишга қаратаилган масалалар ҳам кўтарилди ва унда мавжуд бўлган муаммолардан ўқитувчиларнинг малакасини баҳолаш ва танлаш тизимидаги алоҳида ҳолатлар танқид қилинди. Масалан, ўтган йили 341 минг ўқитувчидан 102 минг нафари тоифа имтиҳонидан ўта олмаганлиги, шунингдек, ишга қабул қилишда билим ва малакани баҳолаш тизими жорий этилганига қарамай, 13 минг номзоддан 6 минги талаб даражасига жавоб бермаётганлиги эътиборни қаратиш керак бўлган ҳолатлардан эканлигини кўрсатмоқда.
Президент таълим муассасаларида замонавий жиҳоз ва лабораториялар етишмаслигини, 300 та мактабда улар умуман мавжуд эмаслигини алоҳида қайд этди.
Таълимда сифатга эришиш учун педагоглар тайёрлов тизимини тубдан ислоҳ қилиш зарурлиги таъкидланди. Унинг учун, биргина мисол Термиз давлат педагогика институти халқаро стандартлар асосида қайта ташкил этилиши, шу билан бирга 47 та мактаб институт амалиёт базасига айлантирилиши борасида топшириқлар берилди.
2025 йилда педагогика олийгоҳлари ва малака ошириш марказларидан ҳамда ҳар бир тумандан камида 5 нафар муаллимларни хорижда малакасини оширишига алоҳида урғу берилди.
Президент "Президент иқтидорли фарзандлари" миллий дастурни бошланишини, "Гарвардчилар мактаби"ни очиш бўйича фармонни имзолаганини маълум қилди. Бу орқали энг иқтидорли ўқувчилар дунё миқёсидаги олийгоҳларга тайёрланиши юртимизда илм, фан ва таълимга қаратилган ишларни яна бир босқичга кўтаришига хисса қўшади.
Шунингдек, таълимдан ташқари болаларни ижтимоий тармоқлардан олиб чиқиш, уларни фан, касб ва спорт тўгаракларига жалб қилиш бўйича кенг қамровли вазифалар белгилаб берилди. Ёзги таътил даврида барча таълим муассасаларида фаол тўгараклар ташкил этиш топшириғи ҳам берилди.
Ушбу йиғилиш таълим тизимида янги босқични бошлаб берди десак муболаға бўлмайди, зеро ҳар бир муаллим, ота-она ва жамоатчилик мазкур ислоҳотларнинг мазмун-моҳиятидан хабардор бўлиши зарурлиги бугунги давр талаби ҳисобланади.

Бугун таълим ислоҳотлари жамиятимизнинг келажаги учун ҳал қилувчи аҳамиятга эга деб ҳисоблаган ҳолда, Биз, депутатлар, халқ вакили сифатида мазкур вазифалар юзасидан қонунчиликни такомиллаштириш ишларини олиб бориш билан бирга, ҳар бир ҳудудда, ҳар бир таълим муассасасида ижро этилиши устидан қатъий парламент назоратини таъминлаймиз.