Она, мени кечир
Кўп йилдан бери
Ёзиб-ёзолмадим
Сенга атаб шеър!
Лоф урдим севгидан
Хўп кўкрак кериб,
Бирда осмон бўлдим,
Бирда қаро ер!..

Ушбу дам иқрорман
Оқ сутинг ҳаққи:
Захар-заққумларни
Ютмадим қанча.
Соб бўлдим, онажон,
Ҳаққинг ҳалол қил -
Оёғимдан чалди
Неча тирранча!

Мени кечирмоққа
Ўргатган эдинг.
Еб битирди валек
Қасоскор бу руҳ!
Кўринмас хиёнат
Ҳеч олди-кети,
Кўзга чўп суққанга
Ким қилур қуллуқ?!

Сендай бўлолмайман,
Бўлолмам асло.
Бунча унутувчан,
Бунча кенгфеълсан.
Устингдан мағзава
Ағдарган касни
Алқайсан. Қандайсан?
Ҳаммага элсан!

Онажон, толиқдим,
Менга ҳам ўргат
Қирқимда ўзингдек
Яшовчанликни.
Энди эпақага
Солмайди йўргак,
Чимчиллаб йўлга сол
Мен эси йўқни!..
07.02.25 АкТ