7 yosh. Maktabga chiqdi. Uy vazifasi ko'p berilardi.

Tezroq maktabni bitirsada shu uy vazifalaridan qutulsa. Zora hayoti shu bilan osonlashib qolsa.

14 yosh. Universitet testlariga tayyorlana boshladi. Qiyin edi.

Tezroq shu universitetga kirsa-yu, bu testlardan qutulsa. Zora hayoti shu bilan osonlashib qolsa.

20 yosh. Universitetda o'qirdi. Ham o'qib, ham ishlardi.

Tezroq shu universitetni bitirib ishga kirsa-yu, shu kontrakt to'lovlaridan qutulsa. Zora hayoti shu bilan osonlashib qolsa.

24 yosh. Universitetni bitirdi. Ishlardi. Endi uylanish kerak. O'rtoqlari allaqachon uylanib bo'lgandi.

Shu tezroq pul yig'sa-yu, uylansa. Zora hayoti shu bilan osonlashib qolsa.

28 yosh. Uylandi. Lekin, uyi yo'q edi.

Shu tezroq uy olishsa-yu, ijara to'lovlaridan ham qutulsa. Zora hayoti shu bilan osonlashib qolsa.

32 yosh. Uy oldi. Farzandli bo'ldi. Lekin, chaqaloq kechasi yig'lardi. Tez kasal bo'lardi.

Shu tezroq bollari kattaroq bo'lsa-yu, bunaqa bosh-og'riqlardan qutulsa. Zora hayoti shu bilan osonlashib qolsa.

45 yosh. Bollari maktabda o'qirdi. Ularni to'garaklariga juda ko'p pul sarflardi.

Shu bollari tezroq kattarib, universitetga kirsa-yu, bu "tugamas" harajatlardan qutulsa. Zora hayoti shu bilan osonlashib qolsa.

50 yosh. Farzandlari universitetga o'qishga kirdi. Endi ular ish topishmasa, ro'zg'or qiyinlashib qolgan.

Shu tezroq bollari ish topishsa-yu, yordam berishsa. Zora hayoti shu bilan osonlashib qolsa.

60 yosh. Farzandlari ishlardi. O'zi nafaqaga chiqdi. Endi to'y qilish kerak.

Shu tezroq bollari uylansa-yu, nabiralarini ko'rib qolsa. Zora hayoti shu bilan osonlashib qolsa.

65 yosh. Farzandlari uylandi. Nabirali bo'ldi. Ammo, o'zini sog'lig'i yomonlashdi. Keksayib qoldi.

Shu tezroq... barchasidan qutulsa.

Rahmat)

@zokiroffpost