Мисли Фирдавсии Тусӣ шаҳписар гум кардаам,
,,Шоҳнома,, дар канорам, тоҷвар гум кардаам.

Ҳамчу Хоқонӣ гиристам дар ғами фарзанди хеш,
Сад қасида дар забон як шоҳасар гум кардаам.

Чун Низомӣ ,,Хамса,, ам вирди намози ишқ шуд,
Ганҷавиям, аз қазо ганҷу гуҳар гум кардаам.

Фоли Ҳофизро кушодам, гуфт, мо ҳамқисматем,
Дар лабам шаҳди ғазал, шириншакар гум кардаам.

Нолаҳои Бедил аз девони дил омад ба гӯш,
Тӯтии Ҳиндустонро бехабар гум кардаам.

Ҷоми Ҷомиро гирифтам, дошт ҷӯше андарун,
Гуфт, аз ҷомам магӯ, ҷону ҷигар гум кардаам.

Шоирам дар собирӣ, ё собирам дар шоирӣ,
Рӯзу шаб дар синаам, шамсу қамар гум кардаам

Озарахшо, сӯхтам, сози Ҳумоюнам куҷост,
Чашми ҳайронмондаам, нури назар гум кардаам.

ОЗАРАХШ

https://t.me/KoriIsmat1917