#Nazm

Meni eslamaysan,
Sezdim, sevmading...
Kutmading sen meni tunda ogʻrinib.
Koʻkka termulmading, bildim, angladim,
Gohida yolgʻondan qoʻyding sogʻinib...

Figʻon ilviradi boʻgʻzingda gohi,
Vale hayqirmading bir bor botinib.
Togʻlar diydasini yumshatdi ohim,
Sogʻinch sujudimdan chiqdi otilib!

Zamin dumaloqdir, vale ikkimiz
Koʻrishib qolmaymiz bitta nuqtada.
Qalin qor yogʻadi toki ikki muz,
Yuraklar rol oʻynar sovuq sahnada.

Roʻyolar qopladi roʻyi zaminni,
Kutmading sen meni tunda ogʻrinib.
Sen asray olmading muhabbatingni,
Bor-yoʻgʻi yolgʻondan qoʻyding sogʻinib...

✍️Durdona Olimova