“Men endi senga hasharotlar haqida so’zlay, xudo ularga “lazzatparastlik” ato etgan:

Hasharotlar - lazzatparastlik!

Men, ukam, ana o’sha hasharotman, bu men haqimda alohida qilib aytilgan. Biz Karamazovlar hammamiz ana shunaqamiz, sen farishta bo’lsang ham, senda ham ana shu hasharot bor va qoningda g’alayon ko’taradi. Bu - bo’ronlar, chunki lazzatparastlik bo’ron, bo’rondan ham kuchliroq! Go’zallik - bu dahshatli va yaramas narsa! Uni ta’riflab bo’lmaydi, shuning uchun dahshatli, ta’riflab bo’lmasligining sababi, xudo faqat jumboqlar yaratgan. Bunda qarama-qarshiliklar birlashadi, sohillar tutashadi. Men, ukam, juda chalasavodman, ammo bu haqda ko’p o’ylaganman. Sirlar dahshatli ko’p! Odamni yer yuzida juda ko’p jumboqlar o’rtaydi. Qanday qilib yechsang, o’zing bilasan, suvdan quruq chiqishni o’yla. Go’zallik! Ba’zi hattoki eng oliy yurakli va eng oliy aql-idrokli kimsa ham Madonna idealidan boshlab, So’dum fahshi bilan yakunlaydi, men buni sira hazm qilolmayman. Undan ham dahshatlisi, So’dum faxshiga giriftor kimsa, ayni paytda Madonna idealini ham rad etolmaydi va bundan uning yuragi yonadi, chindan ham, chindan yonadi huddi ma’sum navqironlik chog’lariday. Yo’q odamning bag’ri keng, hatto ortiq darajada keng, men toraytirgan bo’lardim. Buning nimaligiga ham hayronsan, obbaxolam! Aql tomonidan sharmandali deb topilgan narsa, yurak uchun batamom go’zal tuyuladi. Ishon, So’dum faxshidami go’zallik? Juda ko’pdan-ko’p aksar odamlar uchun go’zallik So’dum faxshida mujassam, sen bu sirni bilarmiding yo yo’qmi? Yana bir chatoq tomoni, go’zallik dahshatligini emas, shu bilan birga, fusunkor narsa. Bunda iblis xudovand bilan olishadi, odamlarning yuragi esa - jang maydoni”.