ҲАҚИҚАТ

Дунё топилади — одам топилмайди!

(тожик халқ мақоли)

Гоҳида бир дилкаш ҳамдам топилмас,
Ёлғизлик ёмон дард, малҳам топилмас.
Сенга бир насиҳат айтайин ўғлим,
Дунё топилгайдур — одам топилмас!

Лаҳзада ўтаркан умрнинг фасли,
Бир-бирига муҳтож одамзот насли.
Инсон инсон учун ғанимат асли,
Дунё топилгайдур — одам топилмас!

Кел — суҳбатим тинглаб чарчама эй дўст,
Муҳаббатим англаб чарчама эй дўст.
Меҳрингни пул билан ўлчама эй дўст,
Дунё топилгайдур — одам топилмас!

Ҳол сўра, бир умр қолгин демасман,
Инон дўст, дунёсин ғамин емасман.
Меҳр бер, пулингга муҳтож эмасман,
Дунё топилгайдур — одам топилмас!

Рост экан, бир дилкаш, ҳамдам топилмас,
Ёлғизлик дардига малҳам топилмас.
Кел эй дўст ёнимдан кетмагил бир пас,
Дунё  топилгайдур — одам топилмас!

КАМОЛИДДИН ШУКУР

@kamoliddinshukur1