Oliy ta'lim, fan va innovatsiyalar vazirligining 2023-yil 14-fevralda barcha oliy taʼlim muassasalari rektorlari va filial direktorlariga "Shoshilich!!!" grifi bilan yuborgan 02/23-2-son xati ilovasida "jinoyatchilikka moyil", "yod gʻoyalar taʼsiriga tushish arafasida" talabalar ro'yxatlarini shakllantirishdan tashqari boshqa qiziq bandlar ham bor. Misol uchun:

- yoshlar oʻrtasida paydo boʻlayotgan yomon illatlardan ogoh qilish maqsadida taʼsirchan qisqa hikoyalar nashr qilish, OTMlarda spektakllar namoyish etish;

- quyosh panellarini oʻz mablagʻlari hisobidan oʻrnatish, isitish tizimlarini (kotyollarni) koʻmirga oʻtkazish, muqobil energetikani joriy etish boʻyicha dastur ishlab chiqish;

- OTMning “sharaf” kodeksini yaratish, xodimlarning ijtimoiy tarmoqlardagi faoliyati boʻyicha eʼlon qilinayotgan maqola va fikrlarga tizim shaʼnini himoya qilish boʻyicha oʻz fikrlari bilan ishtirok etishi boʻyicha tushuntirishlar olib borish.

Xitoyda deyarli 5 yil davomida ilmiy tadqiqot ishi olib borgan olim Baxtiyor Sheraliyev: "Men ayni vaqtda O'zbekistondagi oliy ta'limni borgan sari botqoqqa botib borayotgan tuzilmaga o'xshataman. Chunki botqoqlikka tushib qolganda qancha ko'p harakat qilsangiz shuncha ko'p botqoqqa botib boraverasiz. Sizni tashqaridan bir kuch kelib sug'irib olmasa o'zingiz hech qachon botqoqdan chiqib keta olmaysiz. Oliy ta'lim tizimimiz ayni vaqtda mana shunday holatda ketmoqda..."

Anvar Nazrulloh: "Avval ham aytganman, yana qaytaraman: bizdagi oliy taʼlimni isloh qilib boʻlmaydi deb ishonaman. Yoʻqotib qayta qurish kerak. Buni davlat miqyosida imkoni yoʻq. Kelajak sifatli xususiy ta'lim qoʻlida deb oʻylar edim, LEKIN oxirgi vaqtlarda davlat bezbetlarcha xususiy ta'limga ham aralasha boshladi. ..."

Darvoqe. Xabar berishlaricha, yuqoridagi topshiriq nafaqat davlat OTMlariga, balki xorijiy OTMlar filiallari va nodavlat OTMlariga ham yuborilgan.

Bundan oldinroq rektorlarga o‘z xodimlarining farzandlari bilan maktub orqali yozishmalarni yo‘lga qo‘yish topshirilgan edi.