Barmoqlarim ― yonayotgan chog‘
ko‘zlarimga mangu inar shab.
Sen kelasan,
shafqating tezroq...
Sen kelasan
behishtni hatlab.
Gʻarq bo‘laman nigohlaringga,
O‘tdan kammas turishing o‘tru.
Alahlayman ― anglaysan,
kuygan
so‘zlarimga
suv sepasan, suv...

Manim ko‘nglim shunday besubut,
Manim hol-u hushim ― arosat,
Sen kelasan,
sig‘inganim ― but,
Sen kelasan ―
o‘qiyman oyat.
Dam tush ko‘rar meni jahannam,
Dam jahannam ichida o‘ngman.
Sen tinglaysan,
kuylarim ― motam,
Sen tinglaysan ―
abadiy gungman.

Tabarruklik qiladi ilking
takabburlik istagan boshga.
Xarobligim keladi ko‘rging
Va yo...
rahming keladi boshlab.
Sayyodmidim
sindirguchi yoy,
baroridan kelmasa saydi?
Sen kelasan istab-istamay,
Sen kelasan ―
Xudo istaydi!

©️Rashid Xo‘jamov