🟥 Zahiriddin Muhammad Bobur O‘rta asr Sharq madaniyati, adabiyoti va she’riyatida o‘ziga xos o‘rin egallagan adib, shoir, olim bo‘lish bilan birga yirik davlat arbobi va sarkarda hamdir.

U o‘zining shoh asari - «Boburnoma» bilan jahonning mashhur tarixnavis olimlari qatoridan joy oldi. Bobur o‘zining lirik she’rlarida odamlarni yaxshilikka, adolatga, insonparvarlikka, yuksak insoniy tuyg‘ularni qadrlashga chaqiradi.

Bobur lirik she’rlari va tarixiy «Boburnoma»sidan tashqari, islom qonunshunosligi va boshqa sohalarda ham asarlar yaratgan. Uning o‘sha davr soliq tizimiga oid «Mubayyin», yangi alifbo haqidagi «Xatti Boburiy», aruz vazni va qofiya masalalariga bag‘ishlangan «Mufassal» nomli asarlarini bunga misol sifatida keltirish mumkin. Biroq ularning ayrimlari bizning davrimizgacha yetib kelmagan.

Shunga qaramay, Bobur o‘zining ma’lum va mashhur asarlari bilan tarixnavis adib, lirik shoir va ijtimoiy masalalar yechimiga o‘z hissasini qo‘shgan olim sifatida xalqimiz tarixidan munosib o‘rin egallaydi.