Bugun men uchun yana bir quvonchli kun bo'ldi. Xitoyda PhD qilayotgan shogirdim Akbarjon Ro'zimovning birinchi mualliflikdagi O'zbekiston suv havzalaridagi Schizothorax urug'i vakillarining to'liq mitoxondrial genomi vaturlar filogenetikasi hamda biogeografiyasiga bag'ishlangan maqolasi xalqaro "Zoosystematics and Evolution" jurnalida chop etildi.

Maqolada Schizothorax eurystomus (Sirdaryo havzasi), Schizothorax fedtschenkoi (Zarafshon havzasi) va Schizothorax sp. (Amudaryo havzasi) turlarining to'liq mitoxondrial genomi ilk marotaba sekvens qilingan. Mazkur turlarning filogenetikasi tahlil qilinib, ularning biogeografik xususiyatlari ochib berilgan.

Ushbu maqola bilan ajoyib voqea yuz berdi. Shogirdimning bu maqolani tayyorlayotganini avval boshdan bilardim. Ushbu maqola loyihasi Akbarjonning Xitoydagi laboratoriyasida amalga oshirilgan. Maqola jurnalga yuborilgach jurnal muharrirlari maqolani taqrizlash uchun menga yuborishdi. Dastlab mualliflar tavsiya etilgan taqrizchilar sifatida meni ko'rsatishgan deb o'yladim. Keyinchalik ma'lum bo'lishicha mualliflar aslida Schizothorax lar bo'yicha xitoylik mutaxassislarni ko'rsatishgan ekan. Lekin ish Markaziy Osiyoda bo'lgani uchun menga yuborishgan. Taqrizlash jarayonida shogirdim ancha ter to'kib mehnat qildi va mana bugun uning ilk birinchi mualliflikda ishi chop etildi.

Akbarjon, chin dildan tabriklayman, bunday maqolalarning ko'pginasiga mualliflik qiling. Siz bilan faxrlanaman!

@hujayrauz