Ushbu uchrashuv ikki tomonlama ilmiy hamkorlikning yangi yo‘nalishlarini ochib berdi va xalqaro tajriba almashinuvini kuchaytirishga qaratildi. Xitoy anʼanaviy tibbiyoti ming yillik tarixga ega bo‘lib, tabiat bilan uyg‘unlik, tananing ichki muvozanati va hayotiy energiyani to‘g‘ri boshqarish tamoyillariga asoslangan. Chongqing tibbiyot instituti mutaxassislari bu sohaning zamonaviy tibbiyot bilan uyg‘unligi va samaradorligi haqida maʼlumot berib, institutimiz talabalariga Xitoy anʼanaviy diagnostika va davolash usullari, jumladan, akupunktura, massaj terapiyasi va o‘simliklardan foydalanish texnikalarini amaliy mashg‘ulotlar orqali o‘rgatdilar.

Bundan tashqari, mazkur tashrif davomida ikki oliy taʼlim muassasasi o‘rtasida kelgusida hamkorlikni rivojlantirish va qo‘shma ilmiy tadqiqotlar olib borish bo‘yicha kelishuvlar imzolandi. Ushbu hamkorlik Xitoy anʼanaviy tibbiyoti tajribasini o‘rganish orqali institutimiz talabalari va o‘qituvchilari uchun yangi imkoniyatlarni ochib berishi bilan bir qatorda, mintaqaviy salomatlikni yaxshilashda muhim qadam bo‘lib xizmat qilishi kutilmoqda.

Tashrif davomida talabalar va o‘qituvchilar Xitoy anʼanaviy tibbiyotining noanʼanaviy yondashuvlarini o‘rganib, ushbu usullarni mahalliy tibbiyot amaliyotiga moslashtirish yuzasidan qimmatli tajriba to‘plash imkoniga ega bo‘ldilar. Bu esa Farg‘ona jamoat salomatligi tibbiyot institutining xalqaro miqyosdagi mavqeini yanada mustahkamlashga xizmat qiladi.