Ustozlarga ehtirom – millat ma’naviyatiga bo‘lgan e’tibordir

🎙 Har yili 15-aprel kuni yurtimizda Madaniyat va san’at xodimlari kuni sifatida keng nishonlanadi. Bu sana – nafaqat san’at ahli uchun, balki butun jamiyatimiz uchun yuksak ma’naviy ahamiyatga ega bayramdir. Chunki madaniyat va san’at – bu xalq qalbining, tarixining va orzu-umidlarining musiqasi, sahnasidir.

🟣 Ushbu bayram munosabati bilan O‘zbekiston Respublikasi madaniyat vaziri Ozodbek Nazarbekov tomonidan madaniyat va san’at sohasida fidoyilik bilan mehnat qilgan Farg‘onalik bir guruh faxriy ustozlarga samimiy bayram tabrigi yo‘llandi.

✅ Mazkur tabrik va esdalik sovg‘alarini Farg‘ona viloyati madaniyat boshqarmasi boshlig‘i Jahongir Tojibayev tomonidan faxriy ustozlarning xonadonlariga tashrif buyurib, tantanali ravishda topshirildi. Ustozlar bilan bo‘lgan har bir uchrashuv – ibrat va mehr, samimiyat va minnatdorlik ruhida o‘tdi.

💬Ushbu tashrifda nafaqat esdalik sovg‘alari, balki ustozlar qalbiga bo‘lgan chuqur hurmat, e’tibor va yuksak qadriyatlarning ifodasidir. Yillar davomida san’at va madaniyat sohasida beqiyos xizmat ko‘rsatgan bu insonlar nafaqat asar yaratgan, balki millat ma’naviyatiga zamin bo‘lgan, kelajak avlodga nurli yo‘l ko‘rsatgan ustozlardir.

🎙

Bugun ularning mehnati yuksak baholanmoqda. Zero, madaniyat – bu millat ko‘zgusi, san’at esa qalblarning bevosita tarjimonidir. Ustozlarga ko‘rsatilgan e’tibor – bu aslida butun jamiyatning ma’naviy yuksalishiga xizmat qiluvchi muhim qadriyatdir.

Rasmiy sahifalarimizda bizni kuzating:👇
✅ Telegram | ✅ Instagram |
✅ Facebook | 📹 YouTube