Titroq novdalarda uyg‘onar hayot,
Sarg‘aygan qor kabi erib bitar dard.
Yashin tuyg‘ulardan chayqalasan shod,
Fevral o‘tib borar, yaqinlashar mart.

Musaffo ruhingni olqaydi qushlar,
Maysalar – hayotning shirin tillari.
Uyqungni to‘ldirar eng go‘zal tushlar,
Oyning nurlarini silar qo‘llaring.

Kunlarning chiroyi ochilib borar,
Ochilib borasan kunlarday, go‘zal.
Ikki fasl sening ko‘nglingga qarar,
Ko‘nglingni avaylab qisqarar fevral...

Uning himmati keng toki sen borsan.
Yigirma sakkiz kun tanti sayyorga
Kundan kun go‘zalsan va baxtiyorsan,
Fevral bir juft kunin sochar bahorga.

Havasim sengadur, shodlik ortmoqda,
Sarg‘aygan qor kabi erib bitar dard.
Mening yuragimdan fevral o‘tmoqda,
Sening yuragingga kirib bordi mart.