O‘zbekiston Tashqi ishlar vazirligida Xalqaro xotin-qizlar kuni munosabati bilan tantanali yig‘ilish bo‘lib o‘tdi. Tadbirda vazirlik rahbariyati va xodimlari ishtirok etib, xotin-qizlarga samimiy tabrik va ezgu tilaklar bildirildi.
Marosimda ayollarning diplomatiya va xalqaro maydondagi bebaho o‘rni alohida e’tirof etildi. Ularning fidokorona mehnati xalqaro aloqalarni mustahkamlash, mamlakatimiz manfaatlarini jahon miqyosida ilgari surish hamda tashqi siyosatimizni muvaffaqiyatli amalga oshirishda muhim ahamiyat kasb etishi qayd etildi.
Bugungi kunda vazirlikda faoliyat yuritayotgan xotin-qizlar nafaqat markaziy apparatda, balki xorijdagi diplomatik vakolatxonalarda ham davlatimiz sha’ni va manfaatlarini himoya qilib, o‘z bilim va tajribasi bilan yurtimiz taraqqiyotiga munosib hissa qo‘shmoqda. Ularning fidokorona mehnati va sadoqati tashqi siyosiy faoliyatimizning ajralmas qismi bo‘lib, yuksak e’tirofga loyiqdir.
Facebook |
YouTube |
Instagram |
X
