OʻZBEKCHILIK

Farz erur bermoq salom – oʻzbekchilik,
Qarz erur alik kalom – oʻzbekchilik.

Koʻp yaxshi jihat mujassam bu soʻzda,
Kam emas yomoni ham – oʻzbekchilik.

Eng qadim merosimiz andishadir,
Keltirar tashvish mudom – oʻzbekchilik.

Qiynalib, qarzga botib toʻy qilurmiz,
Soxta dovrugʻ, soxta nom – oʻzbekchilik.

Qand yesin deymiz boyib ketsa birov,
Garchi topgani xarom – oʻzbekchilik.

Poraxoʻrni oʻrgatib xoʻp poraga,
Dod degaymiz batamom – oʻzbekchilik.

Uch qavat, oʻttiz xona uylar qurib,
Bir kitobga “pul tamom” – oʻzbekchilik.

Gohida yakdilmizu, gohi yaktan,
Gohida gʻiybati kom – oʻzbekchilik.

Koʻz yumurmiz oʻgʻrilar qilmishidin,
Gʻalvaga qulogʻi tom – oʻzbekchilik.

Tanimasdin haqqiyu huquqini,
Angrayur, yuzi sholgʻom – oʻzbekchilik.

Qoʻllayur bir-birini juhud, arman,
Bir-birin aylar badnom – oʻzbekchilik.

Oʻzbekchilik qilmangiz koʻp, oʻzbeklar,
Eski tos, eski hammom – oʻzbekchilik.

Nosirjon TOSHMATOV