Davronbek Tojialiyev sahifasi

Батафсил видеоси: https://youtu.be/rOLCNzG88Xk

Telegram | Instagram | Youtube | Facebook | X

Оқсоқотасойда ўтган йиллардагига қараганда сув анча кам. Машинани Тешиктошда қолдириб, шу ердан ўнг тарафдаги тоғлар томон кўтарила бошладик. Мевазор ўрмонлар оралаб асосий тизма томон чиқиб олдик. Бу ерларда қўй ва отлар боқилгани боис ўтлар анча паст. Чорва ҳали кўтарилмаган ҳудудлар 2000 метрдан кейин бошланади. Тепа тарафларда ўтлар анча мўл. Ҳар тарафдан от уюрлари кўринади.

Табиат худди яшил гилам солиб қўйгандек. Яшиллик кўзингизга ёқиб, қийналмай кўтариласиз. Гоҳ арчазор оралаб, гоҳ худди Windows XP фонини эслатадиган ўтлоқлар бўйлаб юрасиз. Ғарбий Чотқолнинг ҳали қори эримаган, оппоқ рўмолли чўққиларига боқиб завқингиз ошади.

Куннинг ярмига етмасдан денгиз матҳидан 2427 метр баландликдаги Тошгаза чўққисига чиқиб бордик. Бу ердан Қизилнура, Ҳавла, Учтош, Шахтёр, Бобойтоғ, Қорақуш, Оқшом, Оқкўл, Иметей, Қораунгур, Катта Чимён, Қумбел, Мойғашқон, Кўкбет, Мингбулоқ, Заршох, Бигизшох, Шохқўрғон, Оқтош чўққиларнинг панорамаси шу қадар гўзал кўринадики, бошқа жойдан бунақа манзарани топиб бўлмайди.

Дарвоқе, “газа” сўзи туркий тилларда “тошли жой, чўққи, тоғ” маъноларини билдиради. Чўққининг пастдан қараганда кўринадиган қисми тошли бўлгани учун шундай аталган. Бу ҳудудлардаги чўққи номларида “шох” (Бигизшох, Заршох, Сафедшох), “тов” (Палтов, Чархтов), “тош” (Оқтош, Учтош, Қоратош) сўзлари ҳам учрайди.

Одатда чўққиларга машаққат билан чиқиб борардик. Бу сафар акси бўлди. Тошгазадан Каттагаза чўққисигача 2 километрлик масофага қарийб 400 метр тушиб бордик. Қайтишда Отжайлов довони бўйлаб юрдик. Дарҳақиқат яйлов жуда кенг ва ўтлоқзор. Атрофда отлар эркин сайр қилмоқда.

Бу кун 20 километрлик сафар давомида жами 1370 метр кўтарилдик.

Батафсил видеоси: https://youtu.be/zNWILHNLNko

Telegram | Instagram | Youtube | Facebook | X

Иккинчи манзилимиз Заршох чўққиси. Қоратутдан кейинги чўққигача йўл ҳам арчазорлар оралаб ўтади. Аслида Заршохга Ҳисорак ёки Кумушкон қишлоқларидан чиқиш осон, лекин биз баҳорнинг гўзал табиатидан баҳра олиш учун узунроқ маршрут танладик. Денгиз сатҳидан 1840 метр баландликда жойлашган Заршох чўққисидан атрофдаги Суренота, Оқтош, Ҳавла, Қизилнура чўққилари яққол кўриниб туради. Чўққининг бундай номланишига тоғдан олтин топилгани сабаб бўлган (зар – олтин; шох, шах – тоғ, чўққи).

Қайтишда яна бошқа томондан юрдик. Охирги манзилимиз Ҳожикўл бўлди. Сафар давомида жами 28 км юрдик, 1271 метр кўтарилдик.

Батафсил видеоси: https://youtu.be/iLyNzGZGjCY

Telegram | Instagram | Youtube | Facebook | X