Nega dam olish kunlarida ko'proq soliq to'laymiz?

Barcha soliqlarning egasi, ya'ni yakunda soliq yukini gardaniga oluvchi shaxs - bu iste'molchi hisoblanadi.

💵 Davlat budjetini shakllantirayotgan har bir so'm mablag'da iste'molchi ishtirok etadi.

🌀 Lekin bu ba'zan bevosita (to'g'ridan to'g'ri), ba'zan tovarlar (xizmatlar) narxiga qo'shimcha sifatida to'lash orqali bilvosita shaklda amalga oshiriladi.

📊 Bayramlar (dam olish kunlari) arafasida aholining iste'mol hajmi ortadi, pirovardida ular uchun to'laydigan soliq summalari ham o'sib boradi.

   Bilvosita soliqlar

1) Yangi yil uchun bozor-o'char qildingiz. Bayram dasturxoni uchun noz-ne'matlar bisyor.

E'tibor berganmisiz, bozorlik uchun berilgan xarid chekidagi summaning ostida (shu jumladan, QQS ... so'm), degan jumla ham bor.

Demak, siz har qanday mahsulot xarid qilish orqali uning 12% qismini qo'shilgan qiymat solig'i sifatida budjetga to'lab berasiz. Shuningdek, agar siz Coca-Cola, Fanta, Pepsi kabi gazlangan, tarkibida shakari mavjud ichimliklarni xarid qilish orqali uning tarkibidagi QQS va aksiz solig'ining to'lovchisiga aylanasiz.

Asos: Soliq kodeksining 239, 284 va 289³-moddalari

2) Bayram shukuhi yaqinlarni birlashishga, qarindosh-urug'larni bir dasturxon atrofida yig'ilishga undaydi.

Shaxsiy avtomashinangiz bo'lsa, demak siz unga benzin, metan yoki propan yoqilg'isini quyish orqali ularning qiymati tarkibiga kiruvchi QQS va aksiz solig'ini ham birga to'laysiz.

Agar jamoat transportidan foydalangan bo'lsangiz ham, 2025-yil 1-yanvardan e'tiboran QQS egasi hisoblanasiz.

Asos: Soliq kodeksining 239, 284 va 289³-moddalari

2024-yil 24-dekabrdagi O'RQ-1014-sonli qonun.

3) Dam olish kunlari aholining keng qatlami o'z xonadonida, oila davrasida bo'lib turishi o'z-o'zidan energiya tovarlari, ya'ni elektr energiyasi va tabiiy gazga bo'lgan ehtiyojning ortishiga sabab bo'ladi.

Demak, kommunal xizmatlardan qancha ko'p foydalansangiz, shuncha ko'p QQS va aksiz solig'i to'lovchisi hisoblanasiz.

Asos: Soliq kodeksining 239, 284 va 289³-moddalari

4) Dam olish kunlarini bayram tadbirlarisiz, konsert-tomoshalarsiz tasavvur qilish mumkin emas.

Yangi yil bayrami arafasida oila a'zolari, asosan bolalar uchun mo'ljallangan, sahnalashtirilgan teatr tomoshalari yoki bayram dasturlari tashkil qilinadi.

Ular uchun sotib olingan chiptalar narxi tarkibida ham QQS mavjud hisoblanadi.

Asos: Soliq kodeksining 239-moddasi

  Bevosita soliqlar

1) Bayram kunlari arafasida ish faoliyatining uzviyligini saqlab turish zaruriyati tufayli xodimlarni ishga jalb qilish holatlari uchraydi. Mazkur mehnat uchun ularga kamida ikki hissa haq to'lanadi.

Shuningdek, ish yili yakunlari bo'yicha xodimlar uchun rag'batlantirish xususiyatiga ega to'lovlar ajratiladi.

Bular o'z navbatida jismoniy shaxslardan olinadigan daromad solig'i hamda ijtimoiy soliq bazasining kengayishiga xizmat qiladi.

Asos: Mehnat kodeksining 263-moddasi
Soliq kodeksining 371, 372 va 403-moddalari

2) Savdo hajmining oshishi (tijorat bonuslari hisobiga ham) o'z-o'zidan soliq to'lovchi bo'lgan yuridik shaxslar va yakka tartibdagi tadbirkorlarning ham foyda solig'i va aylanmadan olinadigan soliq bo'yicha soliq bazasining kengayishiga xizmat qiladi.

Demak, xaridingizdan tushgan daromadlar tadbirkorlik subyektining jami daromadini oshiradi va ko'proq soliq to'lanishiga sabab bo'ladi.

Asos: Soliq kodeksining 297 va 463-moddalari

Yuqoridagilardan xulosa qilish mumkinki, har qanday soliqning egasi, albatta yakuniy iste'molchi hisoblanadi.

Murojaat uchun: @Soliq_Rakursi_bot

@bilimdon_huquqshunos