O‘zbekiston Respublikasi Prezidentining 2024 yil 4 yanvardagi “Chiqindilarni boshqarish tizimini takomillashtirish va ularning ekologik vaziyatga salbiy ta’sirini kamaytirish bo‘yicha chora-tadbirlar to‘g‘risida”gi PF-5-sonli farmonining 4-bandida
Ekologiya Vazirligi, Energetika vazirligi va «Hududiy elektr tarmoqlari» AJ, sanitar tozalash korxonalarining aholiga qattiq maishiy chiqindilar bo‘yicha ko‘rsatilgan xizmatlari uchun to‘lovlarni amalga oshirishda qo‘shimcha qulayliklar yaratish, shakllanayotgan qarzdorlik to‘g‘risida o‘z vaqtida va qulay tarzda xabardor qilishni yo‘lga qo‘yishga qaratilgan quyidagi takliflari ma’qullansin:

a) chiqindi xizmatlari uchun oylik to‘lovlardan qarzdorligi bo‘lgan abonentlarni SMS orqali xabardor qilib borish;
b) qarzdorlik vujudga kelganligi to‘g‘risida oldindan elektron to‘lov tizimlari orqali ogohlantirilgandan keyin to‘lovlar amalga oshirilmagan taqdirda abonentlar chiqindi xizmatlari bo‘yicha qarzdorlikni bartaraf etmaganiga qadar ularning elektr energiyasi uchun to‘lovlarini qabul qilishni vaqtinchalik cheklash amaliyotini quyidagi bosqichlarga muvofiq joriy etish.

1-bosqichda — Toshkent va Nukus shaharlari hamda viloyatlar markazlarida 2024 yil 1 iyundan boshlab chiqindi xizmatlari bo‘yicha 6 oy davomida shakllangan qarzdorlik uchun;
2-bosqichda — respublikaning barcha hududlarida 2024 yil 1 noyabrdan boshlab chiqindi xizmatlari bo‘yicha 3 oy davomida shakllangan qarzdorlik uchun;
3-bosqichda — respublikaning barcha hududlarida 2025 yil 1 yanvardan boshlab chiqindi xizmatlari bo‘yicha 1 oylik qarzdorlik uchun.

Bunda Toshkent va Nukus shaharlarida hamda viloyatlar markazlarida ushbu amaliyot qo‘llanilib kelmoqda. Tumanlarda shu jumladan Paxtachi tumanida ham 1 noyabrdan boshlab, chiqndidan qarzdorligi bo‘lgan abonentlarni elektron to‘lov tizimlari orqali ogohlantiriladi. Shunda ham to‘lovni amalga oshirmasa uyida ishlatadigan elektr energiyasi uchun to‘lovlarni cheklash o‘rnatiladi. Ya’ni birinchi maishiy chiqindisi uchun majburiy to‘lovini to‘lagandan keyingina elektr energiyasiga to‘lash imkoni bo‘ladi. Yuqoridagilarni inobatga olib tumanimiz fuqarolaridan iltimos qilib qolardimki, maishiy chiqindi va elektr energiya bazalari bir biriga integratsiya qilish jarayonida texnik xatolar yuz bergan bo‘lsa uni oldini olish maqsadida, maxallalarga qo‘yilgan nazoratchilarga yoki tuman “Mansurbek Qo‘rg‘on Biznes” korxonasiga kelib to‘g‘rilash mumkin. Bundan tashqari 📞 77-377-71-33 dispetcherlik xizmatiga telefon qilib ma’lumot olishi yoki ma’lumot berishi mumkin bo‘ladi.