Insonlar go‘zallashtiradi
Bakuning aeroportidan chiqdik. Ikki taksist oldimizga kelib, qayerga borishimizni so‘radi. Mehmonxonani ko‘rsatdik.
— 35 manat (~$20) bo‘ladi, — dedi. Narx balanddek tuyuldi.
Boshqa taksi ilovadan narxni solishtirmoqchi edik, to‘xtatib qoldi:
— Ilovadagi taksilar premium, sizga ikki baravar qimmatga tushadi, — dedi.
Soddalik qildik, ishondik. Yo‘lga tushdik.
Keyinroq aldanganimizni bilganimizda, shahar ham go‘zalligini yo’qotgandek bo’ldi.
Ertasi kuni avtobusga chiqdik. Naqd to‘lamoqchi edik, lekin faqat karta qabul qilinarkan.
Shu payt bir ayol oldimizga kelib, biz uchun to‘lamoqchi bo‘ldi. Haydovchi esa jilmayib:
— Mehmonimsizlar, hech narsa kerak emas, — dedi.
Shahar yana o‘z go‘zalligini qaytargandek bo‘ldi…
