#adabiyot | nazm
Na bug‘doy, na somonman,
Na yaxshi, na yomonman,
Na tutqun, na omonman,
Men kim bo‘ldim, Mavloyim?
Ketgim yo qolgim kelmas,
Ovora bo‘lgim kelmas,
Yashagim, o‘lgim kelmas,
Men kim bo‘ldim, Mavloyim?
Ko‘klamimda xazonlar,
Mezonimda naysonlar,
Sukutimda tug‘yonlar,
Men kim bo‘ldim, Mavloyim?
Mo‘min ko‘zi och bo‘lmas,
Tomoshaga o‘ch bo‘lmas,
Orzulari puch bo‘lmas,
Men kim bo‘ldim, Mavloyim?!
© Behzod Fazliddin
Nukta