NPress | Rasmiy kanal

Janubiy Afrikaning ayrim hududlarida harorat minus 4 darajagacha tushgani va qor yog‘gani haqida xabarlar tarqaldi. Ayrim joylarda ob-havo xavfi e’lon qilinib, yo‘llar yopilgan. Bu holatning o‘zi unchalik g‘ayrioddiy emas: Janubiy Afrika janubiy yarimsharda joylashgani sababli hozir u yerda qish fasli. Ammo ayrim hududlarda qor yog‘ishi va haroratning keskin pasayishi mahalliy aholining ham e’tiborini tortgan.

Jeff Bezos boshqa investorlar bilan birgalikda Angliyaning “Liverpool” klubidagi kamida 30 foizlik ulushni sotib olishni ko‘rib chiqmoqda. Xabar qilinayotgan ehtimoliy bitim qiymati 1,35 milliard funt, ya’ni taxminan 1,8 milliard dollar. Klubning umumiy bahosi esa qariyb 6 milliard dollar atrofida. Agar kelishuv amalga oshsa, bu Bezosning professional sportdagi ilk katta investitsiyalaridan biri bo‘ladi.

7–9-avgust kunlari Xivada «Qovun sayli» festivali o‘tkazildi. Festivalga 186 ming mehmon tashrif buyurgan: shundan 150 ming nafari mahalliy, 36 ming nafari xorijiy sayyoh. Ammo eng katta voqea — 259 kishining bir vaqtning o‘zida 10 dan ortiq qovun navini tatib ko‘rishi bo‘ldi. Guinness World Records rasmiy sertifikatiga ko‘ra, ushbu natija 9-avgust kuni Xivada jahon rekordi sifatida qayd etilgan.

Samarqand davlat texnika universiteti olimlari Turkiyaning Chukurova universiteti mutaxassislari bilan birgalikda yangi loyiha boshladi. Qiymati 2 milliard 824 million so‘m bo‘lgan loyihada g‘o‘zapoya piroliz usulida qayta ishlanadi. Natijada bioyoqilg‘i va bioko‘mir olinib, ular asfalt-beton tarkibidagi neftdan olinadigan bitumning o‘rnini qisman bosishi sinovdan o‘tkaziladi. Dastlab asfalt tarkibida 15 foizgacha, keyinchalik 30 va 45 foizgacha foydalanish imkoniyati o‘rganiladi.

Anthropic kompaniyasining Claude sun’iy intellekti Riman gipotezasi bilan bog‘liq tadqiqotda matematiklarga yordam berdi. Bu masala 1859-yildan beri matematika olamining eng mashhur yechilmagan muammolaridan biri hisoblanadi. Tajriba davomida Riman zeta funksiyasi nollarining gipotezaga mos kelishi bo‘yicha ma’lum bo‘lgan quyi chegara 41,6 foizdan 67,2 foizga oshirilgan. Eng qizig‘i — tadqiqotchi Claude’ga murakkab maxsus promptlar bermaganini, asosan “davom et” va “o‘zingga ishon” kabi qisqa rag‘batlantirishlardan foydalanganini aytgan.

2026-yil 1-avgust holatiga ko‘ra, «Soliq» mobil ilovasida 18,1 milliondan ortiq foydalanuvchi ro‘yxatdan o‘tgan. Ulardan 16,9 milliondan ko‘prog‘i faol va doimiy foydalanuvchilar. Google Play’da esa «Soliq» fintech ilovalari orasida birinchi o‘rinda turibdi. Reytingda undan keyingi o‘rinlarni Payme, Click SuperApp, Uzum Bank va Hamkor egallagan.

Euronews’da e’lon qilingan yangi global so‘rovnoma natijalariga ko‘ra, Italiya ruldagi agressiv xatti-harakatlar eng ko‘p qayd etilgan davlat bo‘lgan. So‘rovda qatnashgan haydovchilarning 23 foizi Italiyada agressiv yoki mas’uliyatsiz xatti-harakatlarga duch kelganini bildirgan. Ikkinchi o‘rinda Buyuk Britaniya — 11 foiz, uchinchi o‘rinda AQSh — 9 foiz. Eng ko‘p uchragan holatlar esa haqoratli imo-ishoralar, signalni ko‘p ishlatish, baqirish va oldindagi avtomobilga xavfli darajada yaqinlashish bo‘lgan.

O‘zbekistonda hayvonlarni identifikatsiya qilish, ro‘yxatga olish va kuzatish tartibi belgilandi. Qonunga ko‘ra, jismoniy yoki yuridik shaxslar saqlaydigan yoki ko‘paytiradigan hayvonlar belgilangan tartibda ro‘yxatga olinishi kerak. Masalan, it va mushuklar 3 oyligidan keyin identifikatsiya qilinadi va belgilangan muddat ichida ro‘yxatga olinadi. Qoramol, qo‘y, echki va tuyalar uchun esa boshqa muddatlar belgilangan. Tizimning maqsadi — hayvonlar haqidagi ma’lumotlarni tartibga solish va ularni kuzatish imkonini yaratish.