Ózbekstan - ulıwma úyimiz!

Búgin qazaq xalqınıń kórisiw bayramı. Bayram qutlı bolsın, áziz bawırlar!

🌺🌸🌺KÓRISIW KÚNI🌸🌺🌸

Toqsan shıǵıp keldi búgin kóklem ayım,
Umıttırıp suwıq boran qardıń ǵayın.
Quyash kúlip, tábiyat ta jańalanar,
Náwbáhárge bosatqanda qıs óz jayın.

Ázelden de uqsap dástúr ádebimiz,
Ullı jolda teń basılǵan qádemimiz.
Kóris kúni bizlerden de bawırlarǵa,
Qol alısıp nesip etsin
sálemimiz.

Mehir berip júreklerden bir - birewge,
Haq kewiller quwanıshtan eljirewde.
Nawrız kúni kóriskende bálentlerden,
Tuwısqanlıq bayraqları jelbirewde.

Eki xalıq qız alıp qız beriskenbiz,
Quda jek zat tatıwlıqqa eriskenbiz.
Esen aman jettik pe dep jańa kúnge,
Biz de qalmay qushaqlasıp kóriskenbiz.

Tınıshlıq dep talpınıwshı oyımız bir,
El ishinde quwanısh hám toyımız bir.
Qaraqalpaq Qazaq bolıp merekede,
Ózimizge jarasqanday boyımız bir.

Qutlı bolsın kóris Aytı merekeńiz,
Birge júrsek jerlerdi biz zer etemiz.
Jıldıń bası Nawrızǵa biz arnap ele,
Tatıwlıqta talay qosıq dóretemiz.

Erkinbay Nametov, Shege awılı