MASOFA

😍Оллоёр-ШОУ🤩
🎥НОҚИС: “Ҳажрингда дарду ғам билан ҳасратда доғман”.🎶

Ишқингда зор бўлдиму ғамгин димоғман,
Бемори фурқатингману зоҳирда соғман,
Ақлу ҳушум сенинг била – ўздин йироғман,
Кўрсат юзуингни – толиби нурли чароғман,
Ҳажрингда дарду ғам билан ҳасратда доғман.

Ўлдум жамолинг шавқида – дардинг ололомадим,
Бошингдин, эй санам, нега мен ургулолмадим?
Бир лаҳза ишрат уйида мажлис қуролмадим,
Лаъли лабингни қандини бир дам сўролмадим,
Ҳажрингда дарду ғам билан ҳасратда доғман.

Золим фалак фироқингга солди мени, нетай,
Қандоғ ғамингни сийнада элдин ниҳон тутай,
Сабру қарорим қолмади, эй жон, нечук этай,
Мажнуни бенаво киби ё бош олиб кетай,
Ҳажрингда дарду ғам билан ҳасратда доғман.

Сенсан париваш аҳлини шўҳи замонаси,
Менман сенинг ғаминг била олам фасонаси,
Кўнгул қушининг боиси чангу таронаси
Зулфунгни домию яна холингни донаси,
Ҳажрингда дарду ғам билан ҳасратда доғман.

Ўлсам эди висолингга парвонадек куюб,
Жон берсам эди бошими остонангга қўюб,
Махмурлигим бодаи васлинг била туюб,
Наоқислигимда кўксими тийри мижанг ўюб,
Ҳажрингда дарду ғам билан ҳасратда доғман.
✨
*(Ноқис тахаллуси шоирнинг мажруҳлиги учун танланган бўлса керак).🌙

ТАБРЕЗИЙ ҚАБРИ АВҒОНИСТОНДАМИ?
Бир видеороликни кўриб қолиб, уни юклаб олсам, ўчиб кетди. Унда Афғонистондаги бир мозорни Табрезий қабри дея сиғинишар экан. Олтмиш ёшлардаги Шамсиддин Муҳаммад Али Маликдод Табрезий (1188 - 1248) ўлдирилганида буни яқинлари билмаган. Табрезийнинг ўзи дўст қаландарлар билан тунда Кўнёдан чиқиб кетиш учун уларни кутиб турганида, унинг душманлари - Румийнинг кичик ўғли Алоуддин ва ҳамтовоқлари олдинроқ келиб, ҳовлига чақириб олишади ва ҳар томондан пичоқ уриб, кейин ҳаммомчага олиб кириб, устидан совуқ сув қўйиб, қондан тозалашади. Совуқ фасл эди, қиш.
Масжид ортидаги бу катта ҳовлида Румийлар оиласи истиқомат қилишарди, Табрезийга бир уй ва даҳлиз ажратиб беришганди. Сўнгра мол-ҳолга сув олинадиган қудуққа ташлаб юборишади. Шайх Жалоллиддин Румий-Балхий (1207.Балх -1273. Кўнё) бомдод номози ўқиш учун Табрезийни уйғотмоқчи бўлганида, уни уйидан топа олмай, ўғлини уйғотиб, шаҳардаги барча дарвозалардан хабар олдиради.
Шу билан Шамс Кўнёдан кетиб қолган бўлса керак, деган фикрга боришади. Ҳовлидаги хизматкор хотин қудуқ атрофида қон доғлари борлигини катта ўғил Султон Валадга айтади. Султон Баҳоуддин Валад (1226-1312) бу гапни ҳеч кимга айтмасликни тайинлаб, икки ўртоғи билан тунда қудуққа чангак ташлаб, шоир мурдасини тортиб чиқаришади ва ими-жимида уйларига яқин жойда қурилган бировнинг янги хилхона -оилавий мозори биноси ичига, энг четки девор тагига кўмишиб, устини текислаб қўйишади. Буни сир сақлашнинг икки сабаби бор эди - биринчидан Шамс устози ўлдирилгани ҳақида хабар қирқ ёшдаги Румийга қаттиқ таъсир қилган, руҳан чарчаб қолган бўларди - майли отаси уни тирик деб ўйлай қолсин. Иккинчидан, Табрезийнинг мупридлари, дўст дарвешлари Кўнёга бостириб келиб, бу ерда катта тўполон кўтариб юборишарди. Ўша пайтлари садир этилган кўплаб қотилликларда қаландарларнинг маҳфий сектаси қўли борлигини сезишар, аммл буни ошкора айтиша олмасди.
Бу орада Шамс ҳали ўлмаган деган гаплар ҳамон юрарди. Румий ўтиб кетганидан кейин, Султон Валад бу сирни хотинига айтади. Султон Валад ўлганидан кеин хотини бу гапни ўғлига айтади. Ўғли бу гапни қандайдир китобига ёзиб қўяди.
Орадан 700 йил ўтганидан сўнг, ўша хилхона девори таги очиб кўрилиб, чирий бошлаган кийимларга ўралган суяклар топилади. Бу устихонлар Шамс Табрезийга тегишли экани исботлангач, уни тегишли жойга дафн этишиб, мармартош қўйишади.
Афғонистондаги Табрезий қабри шунчаки бошқа кишининг қабри бўлса керак.
Шамс Табрезий:
Сенга Шамс Табрезий, қойил, ки нафсга бўлмадинг мойил,
Куларсен бандалардан - банди ким нафс ила рўёга. (Бобо Садоий таржимаси)
Оллоёр Хўжандий