O'xshamagan she'rlar turkumidan*


Sinashga sabrimdan boshqasi yo'qmi,
Shundoq ham but emas uning kosasi.
Kun kelar ba'zida qorami, oqmi,
Nega tushunmaysiz odam bolasi..

Jon chiqay deydi-yu, qila olmaydi,
Oh desa qalbimning choki so'kilar.
Ne kechar xayoldan bilib bo'lmaydi,
Ko'zimdan yosh emas zardob to'kilar.

Ketib yuborsaydim tog'-u toshlarga,
Hech kim izlamasa, qilmasa ta'na.
Kun kelib o'tmasa tishim oshlarga,
Tuproqqa qo'shilib ketardim yana.

Bilaman Malika noliyveradi,
Balki lof yozilar satrlarida.
"Yashamagan" - deya yozilsa ajab,
Olamdan o'tganda qabrlarida...


Malika Yoqubzoda