#ШЕЪРИЯТ

НИДО

Қуёш ҳар кун чиқса ҳам,
Тунлар ой тўлишса ҳам,
Зулмат йўқолмас бирдам
Чорасиз қолдик эй воҳ,
Сиз йўқсиз, Расулуллоҳ!

Сиддиқ ғами бошланди
Умар кўзи ёшланди,
Усмон кўнгли ғашланди,
Алий титради ногоҳ,
Сиз йўқсиз, Расулуллоҳ!

Мазлум қалблар тилинди,
Ҳақсиз ҳақлар олинди,
Оҳ, ўрнингиз билинди,
Тополмай қолдик даргоҳ,
Сиз йўқсиз Расулуллоҳ!

Жаҳолат тўлиб тошди,
Зулм ҳаддидан ошди,
Мазлумни ҳўб талашди,
Йиғлаб излаймиз паноҳ
Сиз йўқсиз, Расулуллоҳ!

Уммат ёқа вайрондир,
Гиж гижлардан сарсондир,
Оқил ҳам паришондир,
Ҳамон қазмоқдалар чоҳ
Сиз йўқсиз, Расулуллоҳ!

Ёв кўрдилар суннатни,
Урчитдилар бидъатни,
Тарк этиб шариатни,
Оламни тутди гуноҳ,
Сиз йўқсиз, Расулуллоҳ! (Ҳусайнхон қори)

Бебаҳра бўлиб қолдик,
Бир жойда туриб қолдик,
Тириклай ўлиб қолдик.
Чорасизмиз, ҳам мудроқ,
Сиз йўқсиз, Расулуллоҳ!

Забт этдилар дунёни,
Унутдилар уқбони,
Ўнг санабон рўёни,
Бўлди ақллар гумроҳ,
Сиз йўқсиз, Расулуллоҳ! (Ҳусайнхон қори)

Инсон "ўз"ни унутди,
Кучли кучсизни тутди,
Роса қадрингиз ўтди,
Қолдик топа олмай роҳ,
Сиз йўқсиз, Расулуллоҳ! (Ҳусайнхон қори)

Қуръон, ҳадис номи бор,
Ҳар кас ўз «ислом»и бор,
Ҳар дил интиқоми бор,
Биров истамас ислоҳ,
Сиз йўқсиз, Расулуллоҳ! (Ҳусайнхон қори)

Бари бир кун кетамиз,
Қасдимизга етамиз,
Сизсиз бунда нетамиз?
Ёлғиз дардкаш саждагоҳ
Сиз йўқсиз, Расулуллоҳ!

Минг тўрт юз йиллик фитна,
Ҳамон мавжли унутма!
Аллоҳим, мағлуб этма!
Ҳой Уммат, бўлгин огоҳ!
Биз билан Расулуллоҳ!

Суннатни маҳкам тутсак,
Хурофотни тарк этсак,
Расулуллоҳни севсак,
Аллоҳнинг Ўзи гувоҳ!
Биз билан Расулуллоҳ!

Қуёш ҳар кун чиқса ҳам,
Тунлар ой тўлишса ҳам,
Зулмат йўқолмас бирдам,
Чорасиз қолдик эй воҳ,
Сиз йўқсиз, Расулуллоҳ!

©️ Маҳбубий

📝 Telegram 💻 Instagram
🎞 Youtube   🎶 Tik Tok 
📝 Facebook 📝 Telegram

📌Каналга аъзо бўлиш учун
манзил👇👇👇

https://t.me/AbrorMuxtorAliy