#Mening_qahramonim

                    🪴🪴🪴

Uzun tunlar dard ila ingrab,
Pulni tejab, olmagan malham...
Og'riqlardan kun bo'yi titrab,
60 yoshda ishlagan otam...

Qadoqlardan cheksada ozor,
Sirtdan bizga ko'ringan beg'am...
O'zdan bo'lak ming tashvishi bor,
60 yoshda ishlagan otam...

Istaklarin unutib bir-bir,
Bizni hechdan qilmadilar kam...
Orzularin saqlagancha sir,
60 yoshda ishlagan otam...

Yuzlarida ajinlar bisyor,
Qora qolmay soqolida ham...
Yalchimasdan o'rniga dastyor,
60 yoshda ishlagan otam...

Qorachig'in madori toyib,
Qorong'uda qo'li tutar sham...
Qora choyda ko'zlarin yuvib,
60 yoshda ishlagan otam...

Topganiga ro'zg'orni butlab,
Tili totmas nondan o'zga tam...
Olti bola taqdirin o'ylab,
60 yoshda ishlagan otam...

Ishdan keyin yana ish izlar,
Hechyo'q bir kun olmaydilar dam...
Deganicha - "qiynalmang sizlar",
60 yoshda ishlagan otam...

Ibodatin tark etmay zinhor,
Zikr ila qalbi mudom nam...
Kibr etmay barchaga hokisor,
60 yoshda ishlagan otam...

Shakur robbim bilar albatta,
Har ne uchun O'zi bosh hakam...
33 yosh bo'lsin Jannatda,
60 yoshda ishlagan otam...

© Ibn Zokir

P.s : ushbu she'r yuqoridagi video kelgan baytlardan ta'sirlanib yozildi...