#hamkasblarimiz_ijodidan

Волидангиздан ҳам бир хабар олинг
 
Дунёнинг ташвиши ҳеч ҳам тугамас,
Ҳар битта ҳаракат бекорга кетмас.
Ҳар бир жон ҳам охир муродга етмас
Волидангиздан ҳам бир хабар олинг.

Ҳар нарса ўткинчи, ўтиб кетади,
Сониялар, онлар кунга етади,
Ҳар неки бошланар охир битади,
Волидангиздан ҳам бир хабар олинг.

Мақтанманг хирс қўйиб давлатингизга,
Ўткинчи мол-дунё савлатингизга,
Меҳрингизни беринг жаннатингизга,
Волидангиздан ҳам бир хабар олинг.

Дунёнинг дардида ўтганлар қанча,
Тирноққа зор, ташна ётганлар қанча,
Қаро ерда тонгги отганлар қанча,
Волидангиздан ҳам бир хабар олинг.
 
Кечаси ухламай сизни кутади,
Фарзандингизга ҳам меҳри ўтади,
Кўнглин оғритсангиз ҳам унутади,
Волидангиздан ҳам бир хабар олинг.
 
Бу дунё арзимас фидо бўлишга,
Дардида ғам чекиб, гадо бўлишга,
Ҳам куйиб, ҳам ёниб адо бўлишга,
Волидангиздан ҳам бир хабар олинг.

Онангиз қалбига бир назар солинг,
Майлига бир кунга ёнида қолинг.
Жаннатнинг қошида савоблар олинг,
Волидангиздан ҳам бир хабар олинг.

Рустам Қурбонов
Божхона институтининг 4-курс курсанти