2024-yil Jizzax politexnika instituti uchun, shubhasiz, sermahsul yil bo‘ldi. Yakunlanayotgan yilda institutimiz barcha sohalarda sezilarli yutuqlarga erishdi. Albatta bu oson bo‘lmadi, yutuqlar ortida har bir jamoamiz a’zosining, jonkuyar professor-o‘qituvchilarimizning mashaqqatli mehnati yotibdi. Kelgusida ham muvaffaqiyatlarimiz bardavom bo‘ladi degan umidda qattiq ishlashimiz, izlanishda bo‘lishimiz kerak. O‘ylaymanki, sa’y-harakatlarimiz besamar ketmaydi.

Sifatli ta’lim har bir sohaning asosiy poydevori hisoblanadi. Bugungi shiddatkor zamonda yurtimizda salohiyatli, zamonaviy bilimga ega muhandis kadrlarga ehtiyoj oshib bormoqda. Bu esa, albatta, professor-o‘qituvchilar zimmasiga yangi g‘oyalarni hayotga tadbiq etishni, o‘z ustida tinimsiz ishlab, tajribasini doimo oshirib borish kabi vazifalarni yuklamoqda. Bitiruvchilardan esa yuqori malaka, chuqur bilim, yangicha yondashuv va dunyoqarashga ega bo‘lish talab etiladi.

Kirib kelayotgan Yangi – 2025 yilda sizga va oila a’zolaringizga mehnat faoliyatida, o‘qishda, jamoat ishlarida hamisha omad hamroh bo‘lsin! Vatanimiz taraqqiyoti yo‘lidagi sharafli va mashaqqatli faoliyatingizda – ilmiy-tadqiqot, ijodiy, o‘qish va intilishlaringizda ulkan muvaffaqiyatlar tilayman.

Yangi yil barchangizga tinchlik-xotirjamlik, baxt-saodat, mustahkam sihat-salomatlik, yorqin lahzalar olib kelsin.