Ишқи билан ёнган юракдир,
Ҳақ каломи жонга керакдир,
Ҳажри ила жонлар ҳалакдир,
Ким Худосиз қалби чирикдир,
Чин ошиқ-чун ўзи суюкдир,
Аллоҳ танҳо, Аллоҳ буюкдир.

Сўроқ жойи сирот кўприкдир,
Гуноҳкор кас ўтда куюкдир,
Серсавобга жаннат йўлакдир,
Унга етмоқ олий тилакдир,
Чин ошиқ-чун ўзи суюкдир,
Аллоҳ танҳо, Аллоҳ буюкдир.

Жаннатида сонсиз ҳур малак,
Фаришталар турсалар керак,
Чирой очиб жаннат тўрида,
Расул акрам бўлсалар керак,
Бунга гувоҳ чархи фалакдир,
Аллоҳ танҳо, Аллоҳ буюкдир.

Беҳишт ичра рўза тутганлар,
Худо амрин сидқи этганлар,
Ҳожи бўлиб покланиб келар,
Даргоҳига ҳажга кетганлар,
Чин ошиқ- чун ўзи суюкдир,
Аллоҳ танҳо, Аллоҳ буюкдир.

Иймон келтирганлар Аллоҳга,
Шайтон ишдан бўлинг огоҳда,
Йўлингиздан уриб ногоҳда,
Қолдирмасин сизни гуноҳда,
Кўп истиғфор айтмоқ керакдир,
Аллоҳ танҳо, Аллоҳ буюкдир.

Чекиб заҳмат ҳақ йўлда улар,
Ҳақ васлига бўлди муяссар,
Юз йигирма тўрт минг пайғамбар,
Халқга Ҳақдан келтириб хабар,
Борлигидан берган даракдир,
Аллоҳ танҳо, Аллоҳ буюкдир,

Қорёғди ҳам падар изидан,
Бормоқдадир чиқмай сўзидан,
Кетар вақти ернинг юзидан,
Яхши деб ном қолса ўзидан,
Қалби шод бир ишқли юракдир,
Аллоҳ танҳо, Аллоҳ буюкдир.

Қорёғди шоирнинг ижодларидан.

https://t.me/Jeynov_Chorgumbaz_jome_masjidi