✅
AXIR NAVOIY BOR...

So‘z ochsam, o‘zbekning mahobatidan,
Muqaddas bir ism tilimga yordir.
Baxt yog‘ar bu so‘zning salobatidan:
– Axir, Navoiy bor! Navoiy bordir!

Kimdir moziyni deb itday talashar,
Mening, ortga boqsam, ko‘nglim bahordir.
O‘tmishdan so‘zlamoq menga yarashar –
Axir, Navoiy bor! Navoiy bordir!

Asrlar bostirib kelmoqda qator,
Xudo qo‘llaganga mangulik xordir:
Vaqtning tahdidlari o‘zbekka bekor –
Axir, Navoiy bor! Navoiy bordir!

She’r aro yuribman dalli-devona,
Magar mag‘lub ersam – arzimas kordir:
Nazm falagiga yetmas paymona –
Axir, Navoiy bor! Navoiy bordir!

Xudoyo! Nechun she’r o‘qiyapman sha’n,
Nechun ohanglarim mardonavordir?
Chunki She’r bo‘stoni menga ham Vatan –
Axir, Navoiy bor! Navoiy bordir!

Usmon AZIM

Tilda, fikrda, ishda birlik!

Jadid.uz | Telegram | Facebook | Instagram | YouTube