HAZRATI UMARNING YIG'ILARI
(roziyallohu anhu)
Hazrati Umar (roziyallohu anhu) bir kuni janob Payg'ambarimiz sollallohu alayxi va sallamning muborak qabrlarini ziyorat qiladilar. Ravzai sharif yonida bir a'robiyning duo qilyotganini ko'radilar va uning orqasiga o'tib, duosiga quloq soladilar. Badaviy bunday deb duo qilar edi:
– YO Rabbim! Bu zot – Sening Habibingdirlar, men ham qulingman, shayton esa dushmaningdir. Agar meni mag'firat qilsang, Habibing xursand bo'ladilar, quling najot topadi, dushmaning esa xafa bo'ladi.
Meni avf qilmasang, Habibing xafa bo'ladilar, dushmaning xursand bo'ladi, quling esa halok bo'ladi.
YO Rabbim! Sen Habibingni mahzun qilmaysan, dushmaningni sevintirmaysan, qulingni halok qilmaysan, karami keng, marhamati cheksiz, rahmati nihoyasiz Zotsan.
YO Rabbim, Arablar orasida aslzoda insonlar vafot etganida uning qulini ozod qilish urfi bor. Mana, Olamlarga rahmat bo'lgan zot vafot etdilar. Men qabrlari oldida turgan bir qulman. Meni jahannamdan ozod qil!.
Bu so'zlarni eshitib turgan hazrati Umar ovozlari boricha:
– YO Rabbim, bu a'robiy so'rayotgan narsani men ham Sendan so'rayman! – deb nido qildilar va soqollari ho'l bo'lib ketgunicha o'kirib yig'ladilar
P/s : YO Rabbimiz! A'robiy birodarimiz hamda hazrati Umar roziyallohu anhu so'ragan narsani biz ham Sendan so'raymiz! Habibingni xafa qilma, dushmaningni sevintirma, biz qullaringni halok etma!.. Sen nidolarimizni eshitguvchi, niyatlarimizni bilguvchi Zotsan!..
