Buxoro viloyati Ekologiya boshqarmasi

Buxoroda biologik xilma-xillikni saqlashga bag‘ishlangan ekologik seminar o‘tkazildi

15 may kuni Buxoro shahrida “Amudaryoning quyi qismi va Orolbo‘yi hududidagi suvlari botqoqliklarni saqlash va boshqarish” qo‘shma loyihasi doirasida ekologik seminar tashkil etildi. Tadbir Ekologiya, atrof-muhitni muhofaza qilish va iqlim o‘zgarishi vazirligi, Global ekologik jamg‘arma hamda BMT Taraqqiyot dasturining O‘zbekistondagi vakolatxonasi tomonidan o‘tkazildi.

Seminarda Davlat xavfsizlik xizmati chegara qo‘shinlari, Ichki ishlar vazirligi, Ekologiya vazirligi, O‘rmon xo‘jaligi agentligi, ommaviy axborot vositalari va loyihada ishtirok etayotgan tashkilotlar vakillari qatnashdi. Buxoro hamda Navoiy viloyatlaridagi kuch ishlatar tuzilmalar xodimlari uchun biologik xilma-xillik va muhofaza etiladigan tabiiy hududlar bo‘yicha bilim almashinuvi tashkil etildi.

Bugungi kunda ushbu ikki viloyatda 1,3 million gektardan ortiq muhofaza etiladigan tabiiy hududlar mavjud. Ularni samarali boshqarish va asrashda kuch ishlatar tizimlar bilan hamkorlik muhim ahamiyatga ega.

Buxoro viloyati Ekologiya boshqarmasi matbuot xizmati

#️⃣ #Ommaviy_Yugurish_Marafoni
🏃‍♂️ “Eco – Save Aral – 2025” Ekologik Marafoniga START!
📅 16-may kuni, soat 07:00 da Buxoro shahrida “Atrof-muhitni asrash va Yashil iqtisodiyot yili” doirasida xayriya va ekologik ommaviy yugurish musobaqalari o‘tkaziladi.
🏅 Yugurish quyidagi yo‘nalishlar bo‘yicha tashkil etiladi:
• Talabalar uchun — Talaba-Yugur
• Maktab o‘quvchilari uchun — O‘quvchi-Yugur
• Harbiy xizmatchilar uchun — Harbiy-Yugur
• Atrof-muhitni muhofaza qilishga bag‘ishlangan — Eco-Save Aral 2025
• Barchamiz uchun — Inson Uchun
• Kichkintoylar uchun — Kids Run
🎁 G‘oliblar va sovrindorlar qimmatbaho sovg‘alar bilan taqdirlanadi!
📜 Faol ishtirokchilar esa tashkiliy qo‘mitaning maxsus sertifikatlariga ega bo‘ladilar.
🔥 SHOSHILING! BU SIZ UCHUN BEQIYOS IMKONIYAT!
Sog‘lom turmush tarziga birinchi qadamingizni qo‘ying, biz bilan birga yuguring!
👟 Ishtirok eting va sportchilarimizni qo‘llab-quvvatlang!

📍Musobaqa manzili:👉 LOCATION👈

@buxoroaokb

Rasmiy munosabat

Ijtimoiy tarmoqlarda Buxoroning 7-nohiya yashovchilariga ifloslangan havo tufayli nafas olish qiyin boʻlmoqda Ehtimol yuqori harorat sababli chiqindilar yonib ketadi va havoni ifloslaydi, deb tarqalgan mazmundagi murojaat yuzasidan Buxoro viloyat Ekologiya boshqarmasi tomonidan oʻrganish ishlari olib borildi.

O'rganishlar davomida videomurojaatda ko'rsatilgan manzil Buxoro tumanidagi "Qozi Said" MFY hududida joylashgan Buxoro shahar "Maxsusavtoxo'jalik" MCHJga qarashli chiqindi yig'ish poligonidagi yong'in ekanligi ma'lum bo'ldi.

Mazkur holatni bartaraf etish uchun "Maxsusavtoxo'jalik" MCHJga qarashli maxsus texnikalar jalb qilingan holda yong'inni bartaraf etish ishlari olib borilmoqda.

Shuningdek, boshqarmaning tahliliy laboratoriya bo'limi xodimlari tomonidan Buxoro shahar 7-kichik noxiyasining turli nuqtalaridan atmosfera havosi tarkibidan namunalar olinib, tahlillar o'tkazilmoqda. Tahlillar yakunlari bo'yicha qo'shimcha ma'lumot taqdim etiladi.

Buxoro viloyati Ekologiya boshqarmasi matbuot xizmati

🌿 Issiq havoda daraxtlarni asrash uchun muhim tavsiyalar

1. Qoplamalar va soyalar: Daraxtlarni to'g'ridan-to'g'ri quyosh nuridan himoya qilish uchun ular ustiga mato tortish mumkin. Bu daraxtlarning o'ziga xos haroratini saqlashga yordam beradi.

2. Sug'orish rejimi: Issiq havoda daraxtlar ko'proq suv talab qiladi. Kechqurun yoki ertalab erta sug'orish eng yaxshi natijalarni beradi, chunki shu vaqtlar havodagi bug'lanish pastroq bo'ladi.

3. Mulch qo'llash: Daraxtning atrofiga mulch (qalin yotqizilgan o't yoki tuproq) qo'yish yerning namligini saqlashga yordam beradi va ildizlarni issiqlikdan himoya qiladi.

Buxoro viloyati Ekologiya boshqarmasi matbuot xizmati

Sher to‘rt nafar bola dunyoga keltirdi

Buxoro shahridagi Somoniylar istirohat bog‘ida joylashgan hayvonot bog‘ida sher to‘rt nafar bola dunyoga keltirdi.

Yangi tug‘ilgan sher bolalari sog‘lom va faol bo‘lib, onasi bilan birga maxsus ajratilgan, xavfsiz va qulay sharoitda saqlanmoqda.

Hayvonot bog‘i xodimlarining aytishicha, sher bolalari muntazam ravishda veterinariya nazoratidan o‘tkazilmoqda hamda ularning ovqatlanishiga alohida e’tibor berilmoqda.

Hozircha ular ommaga ko‘rsatilmayapti, ammo yaqin kelajakda tashrif buyuruvchilar ularni ko‘rish imkoniyatiga ega bo‘lishadi.

Buxoro viloyati Ekologiya boshqarmasi matbuot xizmati

Vobkentlik fuqaro noqonuniy maymun saqlagani uchun javobgarlikka tortildi

💬Vobkent tumanida yashovchi fuqaro Q.Z. o‘z uyida "yavanski makaka" turiga mansub maymunni noqonuniy saqlayotgani aniqlandi.

👮‍♀️Ekologiya boshqarmasi va IIB xodimlari tomonidan hayvon, Somoniylar bog‘ida joylashgan hayvonot bogʻiga vaqtincha saqlash uchun topshirildi.

📜Qonunbuzarlik yuzasidan fuqaro Q.Z.ga nisbatan O‘zbekiston Respublikasi Ma’muriy javobgarlik to‘g‘risidagi kodeksining 92-modda prim-1 1-qismi bilan bayonnoma rasmiylashtirilib, hujjatlar sud organlariga taqdim etildi.

Buxoro viloyati Ekologiya boshqarmasi matbuot xizmati

9–may -  Xotira va qadrlash kuni!

Bu kun vatanimiz ozodligi, tinchligi va farovon kunlar uchun jon fido qilgan ajdodlarimizni yod etish, yuksalish va barqarorlik yo‘lida mehnat qilgan va harakatda bo‘lganlarni qadrlash va sharaflash kunidir.

Vatan tinchligi, xalq farovonligi uchun aziz jonini fido qilgan bobolarimizni xotirlash, urush atalmish maydondan omon qaytgan qahramonlarimizni esa qadrlash kunida ularning har birlari uchun duoda bo‘lish va borib yo‘qlash yosh avlodning eng mas’uliyatli vazifasidir.

Xotira va qadr go‘zal odat, ezgu an’ana va boqiylik mezoni bo‘lib saqlanib qolsin!

Bugungi qutlug‘ bayram – Xotira va qadrlash kuni barcha yurtdoshlarimizga muborak bo‘lsin!

Buxoro viloyati Ekologiya, atrof-muhitni muhofaza qilish va iqlim oʻzgarishi boshqarmasi jamoasi

Xotira - abadiy, qadr – muqaddas

Bugun, Buxoro viloyat Ekologiya, atrof-muhitni muhofaza qilish va iqlim o’zgarishi boshqarmasi boshlig’i Jamol Nosirov 9-may -Xotira va Qadrlash kuni munosabati bilan sohada uzoq yillar samarali mehnat qilgan, marhum Anvar Niyozovning xonadonida bo’ldi.

Boshqarma rahbari Anvar Niyozovning yaqinlariga hurmat bajo keltirib, uning ekologiya sohasiga qo‘shgan katta hissasi yodga olindi.

Anvar Niyozov 1960- yil 24 oktabrda Qorako‘l tumanida tug‘ilgan. 1983- yilda Toshkent Irrigatsiya va qishloq xo‘jaligini mexanizatsiyalashtirish injenerlari institutini tamomlagan.

Anvar Niyozov mehnat faoliyatini Respublika “O‘zdavloyiha” yer tuzish va loyihalash institutining Buxoro filialida muhandis sifatida boshladi. 1989- yilga qadar shu tashkilotda partiya boshlig‘i, bosh muhandis lavozimlarida mehnat qildi.

1989-1999 yillarda Buxoro viloyati tabiatni muhofaza qilish qo‘mitasida yer nazorati inspeksiyasi boshlig‘i, qo‘mita raisining o‘rinbosari, birinchi o‘rinbosari vazifalarida ishlagan Anvar Niyozov 2000 -yilda Buxoro viloyati tabiatni muhofaza qilish qo‘mitasi raisi etib tayinlandi.

Ushbu lavozimdagi 17 yillik faoliyati mobaynida viloyatda atrof-muhitni muhofaza qilish, hududni obodonlashtirish va ko‘kalamzorlashtirish ishlariga bosh-qosh bo‘ldi. Buxoroda ekoturizmni rivojlantirishda jonbozlik ko‘rsatdi. Xalq deputatlari viloyat Kengashi deputati sifatida ekologik xavfsizlik ta’minlash, atrof-muhit va fuqarolar salomatligi muhofazasi, tabiiy resurslardan unumli foydalanish va ularni asrash bilan bog‘liq xayrli tashabbuslarni ilgari surdi.

Mehnat faoliyatining so‘nggi yillarida u O‘zbekiston Ekologik partiyasi Buxoro viloyat partiya tashkiloti raisi sifatida mamlakatimiz ekotizimi barqarorligini ta’minlash yo‘nalishida muhim qonunchilik tashabbuslarining ilgari surilishida jonbozlik ko‘rsatdi.

Mehnatkash, fidoyi inson Anvar Niyozovning yorqin xotirasi viloyat Ekologiya atrof-muhitni muhofaza qilish va iqlim o’zgarishi jamoasi, qalbida mangu yashaydi.

Buxoro viloyat Ekologiya boshqamasi matbuot xizmati

Koʻrsatuvning navbatdagi soni bugun 7-may kuni soat 18:30 dan boshlab toʻgʻridan-toʻgʻri efirga uzatiladi.Unda Ekologiya atrof-muhitni muhofaza qilish,va iqlim oʻzgarishi boshqarmasi tomonidan amalga oshirilgan ishlar hamda kelgusidagi rejalar haqida soʻz boradi.

📣Spikerlar:

1.Jamol Nosirov - Buxoro viloyati Ekologiya, atrof-muhitni muhofaza qilish va iqlim oʻzgarishi boshqarmasi boshligʻi;

2. Sardor Usmanov - Buxoro viloyati Ekologiya, atrof-muhitni muhofaza qilish va iqlim oʻzgarishi boshqarmasi boshligʻi oʻrinbosari;

3.Muzaffar Aslonov - Oʻrmonlarni rivojlantirish va choʻllanishga qarshi kurashish shoʻbasi boshligʻi;

4. Nodir Ibodov - Atmosfera havosini muhofaza qilish shoʻbasi boshligʻi;

5. Jobir Toshev- Buxoro viloyati Ekologiya, atrof-muhitni muhofaza qilish va iqlim oʻzgarishi boshqarmasi inspeksiya boshligʻi;

Savol va murojaatlaringizni efir vaqtida 65-223-66-01, 65-223-66-02 telefon raqamlari, shuningdek, telegramdagi @btvuzbot manziliga yoʻllashingiz mumkin.

Buxoro viloyati Ekologiya boshqarmasi matbuot xizmati

Rasmiy munosabat

Ijtimoiy tarmoqlarda Buxoro shahri, Taraqqiyot ko‘chasi 1/2-uy orqa tarafida joylashgan tashlandiq bino va uning atrofidagi maydon chiqindixonaga aylanib borayotgani, bu esa atrof-muhitga salbiy ta’sir ko‘rsatayotgani haqida murojaat tarqaldi. Unda mutasaddilardan holatga chora ko‘rish va ushbu hududni obodonlashtirish so‘ralgan.

Mazkur holat Buxoro shahar Ekologiya boʻlimi inspektorlari tomonidan joyiga chiqqan holda o‘rganildi. Natijada, murojaatda ko‘rsatilgan muammo tasdiqlandi va qisqa muddat ichida holat to‘liq bartaraf etildi hamda hudud tozalanib, chiqindilar olib chiqildi

Shuningdek, ushbu hududga chiqindi tashlagan fuqaro T.Sh.ga nisbatan O‘zbekiston Respublikasi Ma’muriy javobgarlik to‘g‘risidagi kodeksining 91-moddasi 1-qismi asosida 1 125 000 soʻm miqdorda jarima qo‘llanildi.

Buxoro viloyati Ekologiya boshqarmasi matbuot xizmati

Buxoro viloyati Ekologiya, atrof-muhitni muhofaza qilish va iqlim o‘zgarishi boshqarmasi boshlig‘i Jamol Nosirov hamda viloyat Turizm boshqarmasi boshlig‘i Suxrob Bobokalonov Buxoro ixtisoslashtirilgan “Jayron” pitomnigida bo‘lishdi.

Rahbarlar pitomnik hududida qurilgan mehmonxona, sayyohlar uchun yaratilgan sharoitlar bilan yaqindan tanishib, ekologik turizmni rivojlantirish, hududga mahalliy va xorijiy sayyohlar oqimini ko‘paytirish, “Jayron” pitomnikining noyob tabiiy resurslarini keng targ‘ib qilish, hamda pitomnik hududida ekologik yo‘lakchalar tashkil etish, bo‘yicha fikr almashishdi.

Buxoro viloyati Ekologiya boshqarmasi matbuot xizmati