​​Sen yana yo‘lchi

Mayli meni unut, yodimni quvgil,
Nafrat shimdirilgan shamlaring silkit.
Va g‘amga ibodat qilishdan oldin
Men kelar yo‘llarni sandiqqa berkit.

Yurakka in qurgan ilonni chorla —
Ko‘rsa jang qilsin deb ismimni o‘rgat.
Alaming daryo qil, g‘azabing o‘rmon,
Xayoling changalzor — xayolim sudrat...

Yirtilsam —
                   jon tomsa,
                                 bu ham bir ilinj.
Tomsa tomaversa, bizlar so‘nggi bor
Tikilsak
               nur bilan
                            bir-birimizga,
So‘nggi tomchi jon...
               so‘nggi qatim nur...
       nafas so‘nggi bor...

O-o mening bechora aldangan ruhim
Ilinj mezonlarin quvmoqda yana.
Yo‘qlik daraxtlari ufurgan yelning
Qo‘liga umidvor qo‘nmoqda yana —
Ilinj:
Men uchun tug‘ilgan senmisan?
— Siz meni bilmaysiz, gunohlarim ko‘p.
Ilinj:
Yolg‘izman, xaloskor, men seni topdim.
— Men esa ko‘p kutdim, so‘ngra adashdim.

Adashdim...
Yana o‘sha manzilmi — vayrona jonim
Ichida telbaday yugurdim yo‘lsiz,
Ko‘zimdan so‘radim.
Ko‘zim:
— Men qo‘l emasman,
Paypaslab bilsam,
Sarobni najot deb adashdim.
Qo‘limdan so‘radim.
Qo‘lim:
— Men so‘z emasman,
Qanotim manzilga eltsa bexato,
Qayg‘u qarosida soch deb adashdim.
So‘zimdan so‘radim.
So‘zim:
— Men dil emasman
O‘zimni yoqsamu shu’lamda ko‘rsam,
Bahor deb gul ochgan kuzda adashdim.
Dilimdan so‘radim.
Dilim:
— Men ko‘z emasman,
Nigohni nigohim bilan izlasam,
Necha bor mehmonni mezbon deb adashdim.

Na chora,
Umid ham eridi ishq ayozida,
So‘nggi bor shimidi xabarchi turna.
Qanotdan pat berdi, patidan igna,
Xotirin tutqazdi — shaklsiz oyna.
Va dedi:
Garchi unutdirsan, yo‘ling sandiqda,
Hamrohing xayol, ilinjing tilchi.
U seni kutmoqda, garchi bu yolg‘on,
Yo‘lga chiq, yo‘lga chiq, sen yana yo‘lchi.

© Aziz Said

Bizning sahifalarimiz:
📲 Telegram 📸 Instagram
📷 Facebook 🎥 YouTube