Akbar Abdumutalov

Mani hech kim bilmaydigan sirim

Aziz aka Rahimovning parallel muhit loyihasida sotsial kapital mavzusi haqida post o'qidim, u yerda aytilishicha judayam ko'p muvaffaqiyatli insonlarni muvaffaqiyatga erishishining asosiy sabablaridan biri ularda kerakli muhit va odamlar bo'lgani deb aytilibdi. Lekin bu narsa haqida deyarli hech kim gapirmaydi. Ko'pchilik bu muvaffaqiyat ortida sotsial kapital turganini ham bilishmaydi.

Manam o'zimni tahlil qildim.

1. Oddiy oilada tug'ilganimga qaramay mani erta fikrlashim o'zgarishiga 8 sinfda Toshkentda TOP 10 likka kiradigan juda boy odamlarni bollari o'qiydigan maktabga o'tganim bo'lgan. 8-9 sinfdagi muhit juda qattiq ta'sir qilgan.

2. Aynan IT sohasida ketishimga Kompyuter texnologiyalari kollejida o'qiganim va o'sha kollejda o'qish paytida juda zo'r ustoz topganim bo'lgan.

3. O'zbekistondagi yirik tadbirkorlar va loyihalar bilan ishlashimga, Alisher aka Isaevning media jamoasida ishlaganim, ularning menejerlari bilan yaqin do'st bo'lganim sababchi bo'lgan. Keyinchalik bu orqali Umidjon Ishmuhamedov, Ibrohim Gulyamov, Abdukarim Mirzayev va shunga o'xshash yirik tadbirkorlar bilan hamkorlik boshlanib ketgan.

4. 100 dan ortiq loyihalar bilan ishlagan bo'lsak, bizga kelgan mijozlarning 60% dan ko'pi mening do'stlarim tavsiyalari orqali kelgan.

5. Birinchi ishga SMM mutaxassis bo'lib kirgan o'quv markazimda man 2 yil o'qib universitetga tayyorlanganman.

6. Birinchi saytlar bo'yicha mijozim o'zimni kursdoshim bo'lgan.

Albatta bularni hammasi shunchaki bo'lib qolmagan, saytlar va marketingni o'rganish uchun 11.000$ dan ortiq pul sarflaganan, 6.000+ soatga yaqin saytlarni dizaynini chizish bilan shug'ullanganman, lekin yuqoridagi faktorlarni inkor qilib bo'lmaydi!

Shuning uchun kimdirning natijasini ko'rganingizda albatta sotsial kapitalga e'tibor qarating.

Yana bir narsani biling. Hammasi Allohdan, boshqa hamma ishlar sababchi!

Natijasini 20-30 yildan keyin ko'rasiz

Shaharda yurib har xil odamlarni ko‘rasiz, ba’zi odamlarga qarab havas qilasiz, muomalasi zo‘r, qo‘li ko‘ksidan tushmaydi.

Boshqalarga qarab "Men bunday odam bo‘lishdan qo‘rqaman" deysiz, yoshi katta bo‘lishiga qaramay, axloqi o‘ta xunuk.

Nahotki atrofidagilar uni to‘g‘rilamagan, qanday qilib bunday qo‘pol odamlar shu kungacha yashab keldi?

Ustingizda ishlaysiz, tillarni bilasiz, ishingizni mutaxassisisiz, lekin to‘g‘ri axloqsiz uzoqqa bormaysiz.

Buning oqibatlari keyin ko‘rinadi. Faqat o‘zini o‘ylaydigan odamda yillar davomida do‘stlari qolmaydi.

Doim kech qoladigan va ishini sifatsiz bajaradigan xodim kuchli karyera qura olmaydi.

Birovning fikrini qabul qilmaydigan va doim o‘zinikida turadigan odamga haqiqatni aytmay qo‘yishadi.

Suhbat paytida savol bermasdan, doim o‘z haqida gapiradigan odam bilan suhbat olib borishmaydi.

Aytganini bajarmaydigan lafzsiz biznes sherikka vaqt o‘tib biznes rejalar bilan chiqmay qo‘yishadi.

Ingliz tilini bilmaslik oqibati bittada ko‘rinadi, lekin yomon axloqingiz vaqt o‘tib chiqib keladi.

Aqlli bo‘lish yetarli emas, yolg‘iz va pulsiz qarilik kechirayotgan aqlli odamlar yetarli.

Qiziq suhbatdosh, fidoyi xodim, va’dasida turadigan inson bo‘lish muhimroq.

Natijasini esa 20-30 yildan keyin ko‘rasiz

@aqlli_ikkichi

Yedirishyapti

Instagramda mashhur ekan, boshqa usta tavsiyasi bilan ishxonasiga bordim. Masalam hal bo‘lgandan keyin, mashinamni ko‘rib yoqilg‘i sarfini kamaytiradigan va tezlanishni yanada yaxshilaydigan programma o‘rnatishni taklif qildi. Xitoyliklarga tayyorlatgandim dedi. Qabul qildim, ancha pulimni oldi.

3 kun ichida sezdim, mashinam ancha og‘ir yuradigan va yoqilg‘i sarfi 100 km/ 8 litrdan 100/ 13 litrga ko‘payibdi. Oldiga bordim, avvalgi tabassumi, muomalasi ko‘rinmaydi. Masalamni eshitib, shogirdlariga bir nimalar dedi-da, mashinasiga o‘tirib, ichkaridan chiqqunimcha ketib qolibdi. So‘rasam ish vaqti tugagan deyishdi.

Adashmasam, shu kuni poytaxtga qaytishim shart edi, qaytdim. Yaxshilab surishtirib, 45 yoshlar atrofidagi Rustam aka ismli avtoprogrammist kishini topdim. Mashinani tekshirdilar, holati o‘g‘ir ekan, viloyatdagi "usta" lar deyarli buzibdi. Rustam aka “usta" olgan pulning yarim narxiga to‘g‘rilab berdilar. "Xitoy" programmasi gapi ham yolg‘on ekan. Dasturni o‘zimizni Qo‘qondagi bollar tayyorlagan, "usta" ulardan sotib olgan bo‘lib chiqdi.

Rustam aka viloyatdagi "usta"chani ham yaxshi tanir, buzgan mashinalarini tuzataverib charchab ketgan ekanlar. Unga tel qilib biroz koyib ham berdilar, bilishimcha. Undan keyin Rustam akaning oldilariga bir necha marta ish bilan keldim, hal qilib berdilar. Pul bersam olmadilar. Muomala esa har doimgidek, samimiy.

Viloyatda o‘sha kunlari mashinaga propan ham qo‘ydirgan edim, u bilan ham xuddi shunday muammo bo‘ldi. Rustam akaga aytsam, Bahrom aka ismli yoshlari katta mutaxassisga uchrashni maslahat berdilar. Ko‘rishdik, tekshirib, ancha xatolarni topdilar, sal qolsa motor ishdan chiqishi mumkin ekan. Turbo motorlarga propan o‘rnatishni qoidalari bor ekan, bo‘lib ham yangi modeldagi mashinam uchun.

Viloyatdagi gaz ustasi mashinam uchun kuchsizroq uskunalarni qo‘yib qo‘ygan, sozlashda esa odatiy GM’ mashinalari kabi sozlagan ekan. Uskunalarni alishtirish kerak, lekin juda qimmat dedilar Bahrom aka. Keyin, 1 soatcha vaqt sarflab shuni ham "odam" qilib berdilar. Hozir mashinam zo‘r yuribdi, shukr.

Bugun boshqa sohalarda ham bu yigitlar kabi "ustalar" ko‘p, o‘xshagan ishlarinigina ko‘pirtirib tarmoqlarda jar solishadi. Rustam aka va Bahrom aka singari haqiqiy mutaxassislar esa kam. Ular na tarmoqlarga chiqishni bilishadi, na maqtanishni, jimgina ishlarini qilishadi.

Aslida, shular kabilar maydonlarga chiqishi kerak, bo‘lmasam o‘rtalik shoqollarga qoladi, bo‘rilar turganda.

@abdulloh_shamsutdinov

(Yaxshi) marketolog — anqoning urug’i

Bozor rivojlanyapti. Har yili O’zbekiston iqtisodiyoti kamida 6% ga o’smoqda. Dunyo statistikasida ham bu juda katta o’sish hisoblanadi.

• Yaqinda O’zbekistondan birinchi yakkashox kompaniya chiqdi.

• Chet ellik kompaniyalar shu yerda ofislar ochishmoqda.

• Costa keldi, Papa Johns keldi, Uklon keldi, 1Fit keldi, Zeekr keldi, Wolt keladi yaqinda.

• Qo’shimchasiga, necha yillardan beri soyada yotgan metall, sement, quvur kompaniyalari sekin-asta yuzaga chiqib kelishmoqda. Chunki barcha sohalarda raqobat kuchayyapti.

Bu nima degani?

Bu — shu rivojlanayotgan bozorni tushunadigan “bozorchiga” talab oshib bormoqda degani.

Meni o’zimdan yaqin 2 haftada 5+ odam yaxshi marketolog so’radi.

Yaxshi marketolog ham qanday?

“Ishni yaxshi qilsin, kamida 1 yil tajribasi bo’lsin, qolganini o’rgatvolamiz.”

Ya’ni — kompaniyalar juniorsifat marketologlarga ham rozi. Kadr shunchalik kamki, kursni bitirib 10-12 oy ishlaganlarni ham olishyapti.

Bu yana nima degani?

Bu — sizda biroz farosat, biroz bilim va biroz intilish bo’lsa bas. Ish tayyor degani.

O’qing, o’rganing, tajriba orttiring. “Temka” larga chalg’imay o’z sohasini yaxshi mutaxassisi bo’ling. Bozorda talash bo’lasiz.

#bozor / @thinkwithMirro

Bugun pontlar haqida gaplashamiz.

Ko'p maqtanaverish muammolarni berkitish uchun qilinadi yoki muammolarga olib boradi do’stlar.

Afinaning eng taniqli binolari Perikl davrida qurilgan. Qonli urush, ocharchilik, Grek imperiyasining qulashiga ham aynan u sababchi bo’lgan.

Hindistonda dunyodagi eng chiroyli deyilgan maqbara bor - Tojmahal. Uning qurilishi Shohjahon imperiyasini bankrotlikka olib borgan.

Luis XIV davrida Versalni kengaytish, moliyaviy inqirozga, keyin esa Fransuz revolutsiyasiga ulanib ketgan.

Tadbirkor shaxsiy brendiga ko’proq vaqt ajratgani sari, jamoasi qiyinchiligi ortib boraveradi.

Ijtimoiy tarmoqda baxtli ekanligini eng ko’p gapiradiganlar, eng baxtsizlar bo’ladi.

Puli ko’pligini atayin ko’rsatayotganlar, asosan pulingizni olish uchun qilayotgan bo’ladi.

Ishlar ko’ringanidek emas. Boylar berkitadi, baxtlilar jim yuradi, qilayotganlar gapiravermasdan, qiladi.

Maqtaganni yuziga tuproq soching. Maqtangandan esa qoching. Ikkalovidan ham foyda topilmaydi azizlar.

@azizrakhimov_blog

Go’zal bo’lishdan ko’ra, qiziqarli bo’lish afzalroq..

Farosatning uchdan ikki qismini o’rinli joyda, kerakli gapni gapirish tashkil qilsa kerak.