Andijon davlat pedagogika institutida talabalarga qulaylik yaratish, ularni turar joy bilan ta’minlash jarayonida ochiqlik, tezkorlik va axborotdan foydalanish imkoniyatlarini kengaytirish maqsadida talabalar turar joylariga bag‘ishlangan maxsus elektron platforma ishga tushirildi.

Mazkur platforma orqali talabalar va ularning ota-onalari institut tasarrufidagi talabalar turar joylari haqida batafsil ma’lumot olish, mavjud sharoitlar bilan tanishish hamda yashash joyi bilan bog‘liq zarur axborotlardan onlayn foydalanish imkoniyatiga ega bo‘ladilar.

Platformada talabalar turar joylari bo‘yicha ma’lumotlar foydalanuvchilar uchun sodda, tushunarli va qulay shaklda jamlangan. Bu esa, ayniqsa, yangi o‘quv yili oldidan boshqa hududlardan keladigan talabalar uchun zarur ma’lumotlarni masofadan turib olish imkonini beradi.

Yangi elektron platformaning yo‘lga qo‘yilishi institutda talabalarga xizmat ko‘rsatish jarayonlarini raqamlashtirish, murojaatlarni kamaytirish va zarur ma’lumotlarni yagona manbada taqdim etish borasidagi ishlarning yana bir amaliy natijasidir.