Ажойиб шоира Марҳабо Шодмоновадан исёнкор бир шеър. Ижодга қайтгани рост бўлсин.

* * *

Балолар бошига келади бошлаб,
Кўзларим чўғига қаланган ўтлар.
Хўрликларга чидаб, қалбни тарошлаб
турмоқни оналар садоқат санар.

Менинг исёнларим бўғзимда ўлар,
Фарёдим бўғилар чиқмаган жондек.
Оталар ғурури кўзимга қулар -
Қизда насл юрмас - аламзадалик...

Сукутда чинқириб йиғлайди қадар -
Аёл бўлмоқ хато...
Худодан ато!
Бошимни тик тутиб кетарман бадар -
Эркакдан эркакроқ яратган Мавло!

Дунёнинг дорлари мўлтирар гаранг,
На бошим, на жисмим сиғдиролмайди.
Қисматнинг торлари тортилар таранг
Кўзларимда қўрқув туғдиролмайди.

Тентираб кетаман,
қўшиғим видо,
Тупроқлар соғиниб изимни ўпар.
Жисмимда бир сатанг,
Руҳимда гадо,
Ҳамма қиёматлар кўксимда қўпар...