Voha yoshlari masalasiga doir yig‘ilish va taqdimot o‘tkazildi

Viloyat hokimligida yoshlar tadbirkorligini rivojlantirish, bandligini ta’minlash, ularni har tomonlama qo‘llab-quvvatlash va bo‘sh vaqtlarini mazmunli o‘tkazishga doir Prezidentimiz belgilab bergan rejalar ijrosiga doir yig‘ilish o‘tkazildi.

Ma’lumki, joriy yilning 14 fevral kuni Prezidentimiz yoshlar bilan samimiy muloqot o‘tkazib, unda yoshlar tadbirkorligida mutlaqo yangi davrni boshlab beradigan 3 ta katta hujjatga imzo chekkanini e’lon qilgan edi.

- Birinchi hujjatga muvofiq, Yoshlar agentligi huzurida Yoshlar tadbirkorligini rivojlantirish jamg‘armasi tashkil etilib, unga 100 million dollar mablag‘ ajratildi;

- Ikkinchi qaror bilan oliygoh bitiruvchilari bandligini ta’minlash bo‘yicha yangi tizim yaratilmoqda. Buning uchun Milliy bankka 100 million dollar resurs beriladi;

- Uchinchi hujjatga ko‘ra, Aloqabank yoshlarning biznes loyihalarini qo‘llab-quvvatlovchi tayanch “yoshlar banki”ga aylantirilib, bunga 200 million dollar ajratildi.

Shuningdek, rahbarlar mas’ullarning yoshlarda vatanparvarlik ruhini kuchaytirish bo‘yicha “mahalla – sektor – tuman – viloyat – respublika” darajasida o‘tkaziladigan harbiy-sport musobaqalarini tashkil etish taqdimoti bilan tanishishdi.

Yig‘ilishda Prezidentimizning ijtimoiy-siyosiy, diniy-ma’rifiy va yoshlar masalalari bo‘yicha maslahatchisining yoshlar masalalari bo‘yicha o‘rinbosari Abdusalom Azizov va "Aloqabank"ning boshqaruv raisi Kammuna Irisbekovalar ham ishtirok etdi.