Kelma
Endi kelma, nima qilasan,
Parcha-parcha bo‘lib bo‘ldi dil.
Ko‘nglingdagi haqiqatlarni,
Va nihoyat ayon etdi til.
Endi kelma, kela ko‘rma, yo‘q,
Ketavergin sevgingdan tonib.
Yoqib bo‘lding neki muqaddas,
Umiding ham ketmasin yonib.
Endi kelma, kutsam ham kelma,
Kutganingdek kutolmam endi.
Uloqtirding meni o‘zimga,
Yana senga tutolmam endi.
Endi kelma, ketolmasang ham,
Ketmasam-da kel deyolmayman.
Sevgan edim yolg‘oning bilan,
Chining bildim, chin sevolmayman.
Endi kelma, so‘nmoqda hislar,
Iztirobning quchog‘ida jim.
Endi so‘nik qorachiq bilan,
Senga mangu kelmas termulgim.
Endi kelma, kelma ko‘rgani,
Otgan o‘qing tegdi qalbimga.
Sendan va’da olgandim, ammo,
Endi kelma hatto qabrimga.
Endi kelma, kelging kelsa, ket,
Ketish yaxshi degan ham o‘zing.
Yuragimga mangu qadaldi,
Yuragingdan chiqqan bir so‘zing.
Endi kelma. Kelib bo‘ldingmi???
Bitmasidan she’rim batamom.
Shu she’r haqqi kechirdim, mayli,
Faqat kelma, kelganda ilhom.😊
Sherbek Islomov
https://t.me/sherbek_islomov
