​​РУҲ

Фотиҳа сурасин бир кунжидасан,
Ойнинг манзилларин ҳар буржидасан,
Ер етими, осмон илинжидасан,
Сирингни каслару зотлар билмаслар.

Гулнинг кулгусида, шом қайғусида,
Илк бор севги кирган дил туйғусида,
Эриётган музнинг шаън йиғисида...
Шаклингни ғамлилар, шодлар билмаслар.

Қайлардан келяпсан, боряпсан қаён,
Ўткинч вужуд ичра  беш кунлик меҳмон,
Қанча яқин бўлсанг, шунча  ноаён,
Тилингни тилдошлар, ётлар билмаслар.

Тобут оғочидан гул қидирган сен,
Тонглар шудринг кечиб нур қидирган  сен,
Капалакдай тинмай дил қидирган сен,
Ўйинингни ғолиб, мотлар билмаслар.

Фотиҳа сурасин бир кунжидасан,
Ойнинг манзилларин ҳар буржидасан,
Ер етими, осмон илинжидасан,
Сирингни каслару зотлар билмаслар

Эшқобил ШУКУР