Олий суд | Расмий канал

БАЁНОТ

Куни-кеча Олий суд томонидан фуқаролик ишлари бўйича судларда вояга етмаганларнинг манфаатида алимент ундириш билан боғлиқ ишларни кўриб чиқилиши, бу борада қонунларни қўллашдаги муаммолар, уларнинг ҳуқуқий ечимларига доир семинар-йиғилиш ўтказилди.

Бу бўйича жойлардаги судларга юборилган алоқа-хатида амалиётдаги айрим ҳолатлар (хато ва камчиликлар)га судьялардан изоҳ сўралгани гўёки "Судлар тўғрисида"ги қонуннинг 66-моддасига зид ҳаракат сифатида талқин қилинди.

Дарҳақиқат, қонунга кўра, судьядан кўрилган ёки иш юритишидаги ишлар моҳияти бўйича бирон-бир тушунтиришлар беришни талаб қилиш тақиқланади.

Масала эса, қонун нормаларини тўғри англаб, уларни тўғри талқин этишдадир.

“Судлар тўғрисида”ги қонуннинг 18-моддаси 2-қисмига кўра Олий суд қуйи судларнинг судлов фаолияти устидан назорат олиб бориш ҳуқуқига эга. Шундан келиб чиқилса, ягона суд амалиётини таъминлаш одил судлов даражасини оширишнинг муҳим омили экани яна бир карра ойдинлашади, айни шу мақсадда муайян масалаларда судьялардан изоҳ сўралиши эса уларнинг фаолиятига аралашув эканини англатмайди.

Олий суд органи мутасаддилари томонидан ўзи масъул бўлган ихтисослик бўйича амалиёт таҳлилидан келиб, семинар-йиғилиш ўтказиши, уларда айрим камчилик ёки қонунчиликни қўллашдаги моддий ва процессуал хатоликлар муҳокама қилиниши одил судлов сифатини оширишга хизмат қиладики, буни тўғри тушуниш ва жамоатчиликка ҳам тўғри тушунтириш лозим. Чунки муаммоларга муҳокама ва баҳслар орқали ечим топилади.

Сайт I Telegram I Facebook I YouTube I Instagram

Президентимиз Шавкат Мирзиёев раҳбарлигида ўтказилган Коррупцияга қарши курашиш миллий кенгаши йиғилишида қўйилган вазифалардан келиб чиқилса, судьялардан шахсий масъулиятни ошириш, одил судловни таъминлаш ва жамият ишончини мустаҳкамлаш талаб этилади.

Судьяларнинг ҳалоллиги, холислиги ва фаолиятида шаффофликни таъминлаши – коррупциянинг олдини олишда ҳал қилувчи омиллардан.

Тошкент шаҳар судида коррупцияга қарши курашиш масалаларига бағишланган йиғилишда шу ҳақда сўз юритилди.

Тошкент шаҳар суди раиси Э. Хўжақулов суд-ҳуқуқ тизимида коррупциянинг олдини олиш, одил судлов жараёнларининг шаффофлигини таъминлаш ва тизимда ички назорат ҳамда масъулиятни кучайтириш зарурлигини қайд этди. Коррупцияга қарши курашишнинг долзарб йўналишлари, Олий суд раиси томонидан судьялар ва суд органлари ходимларига йўлланган мурожаатга алоҳида эътибор қаратди.

Мурожаатда судьяларнинг ўз фаолиятига танқидий ёндашиши, шахсий масъулиятни ҳис этиши, фуқаролар билан очиқ ва холис мулоқотда бўлиши, ҳар бир қарор қонуний, адолатли ва асосли бўлиши зарурлиги таъкидланган.

Тошкент шаҳар суди раисининг ўринбосари - фуқаролик ишлари бўйича судлов ҳайъати раиси Б. Исломов фуқаролик суд ишларида учраши мумкин бўлган коррупциявий хавфлар ва уларнинг олдини олиш масалаларига тўхталди.

Суд жараёнларини рақамлаштириш, очиқликни таъминлаш ва малакали кадрлар тайёрлаш – коррупцияга қарши самарали курашнинг муҳим шартларидан бири экани таъкидланди.

Судьялар томонидан коррупцияга нисбатан муросасиз муносабатда бўлиш, ички назоратни кучайтириш, судьяларнинг касбий ва ахлоқий савиясини ошириш ҳамда жамоатчилик ишончини мустаҳкамлаш бўйича аниқ вазифалар белгилаб олинди.

Сайт I Telegram I Facebook I YouTube I Instagram