Shuhrat Aslanov: “«Nasaf-Farm» yosh va umidli futbolchilarga imkoniyat berish uchun tuzilgan”Bugun Oʻzbekiston Professional futbol ligasi “Nasaf-farm” jamoasi keyingi yilda ProLiga musobaqalarida ishtirok etmasligini eʼlon qildi. Bu holat yurtimizdagi OAVida yoritildi. Muxlislar esa bu xabarni turlicha qabul qilishdi. Klubimiz prezidenti Shuhrat Aslanov ushbu holat boʻyicha fikrlarini bildirib oʻtdi.- “Nasaf-Farm” jamoasi bu yil 1-liga musobaqalarida chempionlikni qoʻlga kiritdi. Chempionlik futbolchilar va murabbiylar qatori bizni ham xursand qildi, albatta. Musobaqa gʻolibligi esa keyingi mavsumda Pro Ligada ishtirok etish imkoniyatini beradi. Pro Liga musobaqasida esa asosan Superligaga chiqishni maqsad qilgan jamoalar ishtirok etishi barchaga maʼlum.
Farm jamoamizning Pro Liga bellashuvlarida ishtirok etmasligi haqidagi xabar futbolchilar va ularning ota-onalarining dilini biroz xira qilgani aniq. Lekin masalaning ikkinchi tarafi ham bor. “Nasaf” futbol klubida yaxshi tizim yoʻlga qoʻyilgan. Klub qoshida futbol maktabi faoliyat yuritadi. Maktabning U-19 va U-21 yoshdagi tarbiyalanuvchilari ham OʻzPFL musobaqalarida ishtirok etishadi. Oʻz-oʻzidan U-19 va U-21 jamoalarida yosh chegarasi sabab oʻyin amaliyotisiz qolib ketayotgan umidli futbolchilar uchun biz aynan “Nasaf-farm” jamoasini tashkil qilgan edik. Biz oʻzimizning maktabdan chiqqan yigitlarga mana uchinchi yildirki, imkon berib kelmoqdamiz. Bu jamoamizning asosiy vazifasi bosh jamoaga yaxshi futbolchilarni yetkazib berish edi. Bosh jamoaning qishki yigʻinlarida ham farm jamoasidan futbolchilarni koʻrikdan oʻtkazish maqsad qilingan.
Farm jamoasining Pro Ligadagi ishtiroki klubning yillik xarajatlari uchun yuklamani oshiradi. Shu sababli jamoa Pro Liga musobaqasida ishtirok etmaydi va 2025-yilda ham 1-Liga musobaqasida qatnashishi taʼminlanadi. “Nasaf”ning rivojlanish strategiyasiga koʻra, bu mablagʻlar futbol maktabining barcha jamoalari, U-19, U-21 va “Nasaf-Farm” jamoalarining keyingi yildagi musobaqalarda sifatli ishtiroki uchun sarflanadi.
📱
@fcnasaf
