Меҳриноз:
Нега жимсиз? Итлар қани, карвон қани?
Ватан қани, севги қани, иймон қани,
Биз ишонган, биз сиғинган ёлғон қани,
Шиор қани, қадр қани, инсон қани,
Қуёш қани, кўз ёш қани, осмон қани?

Қисматимиз йўқликмиди, ночорликми,
Ўз ерида қулликмиди, хор-зорликми,
Эпладингиз, дўндирдингиз тужжорликни,
Нега жимсиз? Итлар қани, карвон қани?

Қўрқаманки, бундан баттар чоғлар келур,
Йўлимизга сиз қазиган чоҳлар келур,
Денгиз-денгиз, тўлқин-тўлқин «оҳ»лар келур,
Халқ қаерда, куч қаерда, Чўлпон қани?

Отай десам, қўлимдаги тошим етмас,
Йиғлай десам, кўзимдаги ёшим етмас.
Қолай десам, бу таҳқирга дошим етмас,
Кетай десам, бошқа Ўзбекистон қани?!