Фарзанд тарбияси ҳар қандай даврда энг муҳим вазифалардан бири бўлиб келган. Бугунги кунда эса у янада мураккаблашиб бормоқда. Замонавий гаджетлар, глобал маданиятнинг таъсири ва ижтимоий тармоқларнинг кучайиши ота-оналар ва фарзандлар ўртасидаги муносабатларга ўз таъсирини ўтказмай қолмаяпти. Кўпчилигимиз яхши ният билан фарзандларимизга таълим олиш, моддий фаровонлик ва эркин танлов имкониятларини беришга интиламиз. Аммо шу жараёнда, инсоний қадриятларни сингдириш, маънавий тарбия ва оилавий мулоқот каби муҳим жиҳатлар иккинчи ўринга тушиб қолаётгани ачинарли ҳақиқатдир.