Inom Raximov | Blog

Atrofimizdagi niqobli odamlar

Holatlar insonni qurmaydi, balki uning kimligini o‘ziga ko‘rsatib qo‘yadi. © Epiktetus

Turli holatlar, yaxshi va yomon kunlar insonni o‘zgartirib qo‘ygandek tuyiladi.

Aslida esa vaziyatlar uning asl yuzini ko‘rsatgan bo‘ladi. Inson qurib bo‘lingan, muammolar uni kimligini ochib beradi xolos.

Insonni aslida kimligini stress holatida bilasiz. Gitler ham mehri jo‘shib ketganida kimgadir yaxshilik qilgan bo‘lishi mumkin. Lekin kim kimligini noqulay/qiyin holatlarda ko‘ramiz.

Normal holatda jamiyat qoidalari deb yuzimizda niqoblar taqamiz. Boshqalar bizga qarab turishadi. Ko‘pincha aslimizni bilishimiz ham qiyin bo‘lib qoladi.

Kattalar qarz oldi-berdi qilmagan, birga safar o‘tkazmagan va qiyinchilikda sinalmaganlarni hali do‘st deyishga shoshilma deyishardi. Ular adashmagan!

Do‘st tanlashda shoshilmang va tanlanish uchun yaxshi do‘st bo‘ling!

@inomraximov

Eng baxtli insonlar ertalab ishini kechki payt uyini sog‘inadigan insonlardir.

Juda kamyob bo‘lgan bunday insonlar ishini ham, oilasini ham yaxshi ko‘radi va ikkalasida ham qadr topgan insonlar bo‘ladi.

@inomraximov

Boshi sustkashlikning oxiri qiyin

Kecha yarim marafonni 2 soatda tugatishni reja qilgandim. 2 soatda 25 daqiqa ketib qoldi.

Marafon o‘rtasida va oxirida yetarlicha tezlikda yugurdim. Menimcha boshida sekinroq, bemalol yugurganim uchun ham kech qoldim!

Hayotda ham shunaqa. Hozirgi sustkashligimiz ertamiz, kelajagimizdagi natijalarimizni ortga suraveradi.

• Dastlabki talabalik yillarimda, vaqtim bo‘la turib ingliz tilini ortga suraverganman. Endi majburlikdan vaqt topib o‘rganyapman.

• Boshidan kasbimni o‘rganib amaliyot qilishim kerakligi bilardim, bitiruvchi yilimdagini bu ishni qilishni boshladim. Endi tezroq o‘rganishim kerak.

Murakkab ishlar ma’lum davomiylik talab qiladi. Boshida kam ishlasak oxirida ko‘p ishlashga to‘g‘ri keladi baribir.

Qisqasi bo‘shashmang!

@inomraximov

Uyqu me’yorimni qanday aniqlayman?

Bizni Alloh taolo bekorga uxlaydigan qilib yaratmagan va me’yorimiz 7-8 soat qilib qo‘yilmagan. Sog‘lom uxlash organizm uchun shart. Chala uxlagan inson = chala inson!

Bilamizki uyqu uchun ideal vaqt 22:00 - 6:00 oraliqlarida. Nega?

1. Shu vaqtdan boshlab uyquga javob beruvchi melatonin maximum ishlab chiqarilishni boshlaydi va bizni uyquga tayyorlaydi.

2. Ertaroq uxlash uyquning barcha fazalari to‘liq o‘tilishini va tana to‘liq qayta tiklanishini ta’minlaydi.

3. Ertalab shu vaqtda bizni uyg‘otuvchi kortizol garmoni ko‘payishni boshlaydi va biz tabiiy siklga mos kelgani uchun osonroq uyg‘onamiz va kun davomida tetikroq bo‘lamiz.

4. Inson tabiiy quyosh botganda uxlab, tong otganida uyg‘onishga moslashgan va shu tartibda biz tetikroq bo‘lamiz.

Necha soat uxlash kerak?

2017-yildagi 40 000 kishi qatnashgan so‘rovnomada miyaning eng yaxshi ishlashi uchun 7-8 soat oralig‘idagi uyqu zarurligi aniqlangan.

O‘z me’yorimni qanday topaman?

Uni topish uchun o‘rtacha norma (6-9) uyqu soatlarni sinab ko‘rishingiz mumkin. Misol uchun bir oy 6 soatdan uxlaysiz va kayfiyatingizni baholaysiz, keyingi bir oy 7 soatdan uxlab shu ishni takrorlaysiz.

Eng samarali oyingizdagi uyqu vaqti katta ehtimol bilan sizning normangiz. Shu orqali sizga mos davomiylikni topasiz.

Tushungan bo‘lsangiz - ⚡️

Bo‘lmasa izohlar ochiq ⬇️

@inomraximov

Nega uxlash kerak o‘zi?

1. Tana qayta tiklanadi: Uyquda tanamiz hujayralari tiklanadi, miya organlarga signallarga yuborib ularning faoliyatini to‘g‘rilaydi.

2. Miya tozalanadi: Kun bo‘yi informatsion oqimdan charchagan miya uyquda kerakli ma’lumotlarni saqlab, kerakmasini o‘chiradi.

Biz uxlamasdan yodlay olmaymiz. Chuqur uyquda hujayralar oralari kengayib miya suyuqligi orqali miya tozalanadi.

3. Ruhiyatni yaxshilaydi: Yetarli uyqu kayfiyatni yaxshilaydi va stressni kamaytiradi. Kam uyqu odamni jizzakilik, diqqatsizlik va tushkunlikka olib kelishi mumkin.

4. Salomatlik va uzoqroq umr: Uzoq yashaydiganlarning ko‘pchiligi to‘g‘ri uxlaydiganlar bo‘ladi. Sog‘lom uyquda betaameloidlarni miyaga yig‘ilmaydi, bu degani qariganda altsgeymer (jinni) bo‘lmaysiz.

5. Qayta tiklanish: Uyqu irodani va tanani quvvatga to‘latadi. Ish va miya faoliyatini yaxshilaydi. Uyqu bizga telefonga quvvatlagichdek muhim.

Uyqu vaqtni olish emas, u ertangi tana mashinangiz uchun benzindir ⚡️

@inomraximov

Erta uyg‘onsa va kechasi xotirjam uxlab qolsa bo‘ladimi?

Qanday qilib lanjlikdan qutulib, energiyaga to‘la yurish mumkin?

Uyqu me’yoringiz qanaqa? Uni qanday aniqlash mumkin?

Vaqtni tejash maqsadida kamroq uxlash qanchalik to‘g‘ri?

Qachon, qancha va qanday holatda uxlash kerak?

Inson uxlaydigan qilib yaratilgan va uni tartibga solish muhimligiga qaramasdan ko‘pchilik bunga amal qilolmas ekan.

Balkim ularga bilim yetishmas?! Shu sababdan uyqu haqida hammasini gaplashamiz va yuqoridagi savollarga javob topamiz. Ilmiy asoslar va shaxsiy xulosalarimni bo‘lishaman ⚡️

Uzoqqa ketib qolmang, tez orada boshqalar havas qiladigandek uxlaysiz 🫠

@inomraximov

20 kunlik #Chellenge hisoboti:

1. Uyg‘onish: 17 kun davomida 5:00 gacha uyg‘ondim, 3 kun biroz dangasalik qilib 7:00 gacha uyg‘ondim.

2. Sport: Chellenj davomida jami 13 soatdan ortiq sport bilan shug‘ullandim, jami 38 kilometr masofani yugurdim.

3. Soham: Asosiy montaj kursimni takrorlab chiqdim, 30 tadan ortiq videoni montaj qildim, 4 marta katta masterklass, rolik syomkasiga yordamlashdim. Buyog‘iga maqsad sohamda professional bo‘lish.

4. Kitob: "Zukkolar va Landavurlar" 100-betiga keldim 10/10. "Mahorat" kitobi 110-betiga keldim 9/10. "Faqat ahmoqlar 8 soat uxlaydi" kitobini tugatdim 7/10.

5. Maqola: Blogimda 20 ta maqola yozdim, kimgadir foydasi teggan bo‘lsa xursandman.

Sovimasidan yangi #Challenge boshlaymiz, @raximovdaily’ga qo‘shilib oling va birgalikda rivojlanamiz ⚡️

Qaraganimizni ko‘ramiz xolos

Qo‘lida bolg‘asi bor odamga hamma muammo mix bo‘lib ko‘rinadi. © Aziz Rahimov

Har bir soha egasi davlatdagi eng katta muammo yechimini o‘z sohasida deb biladi.

Qachon odamlar baxtli bo‘ladi savoliga kimga berishingizga qarab javobni oldindan bilish mumkin.

Shifokorlar baxt sog‘liqda deyishadi. Ishchilar yuqori oylikda. Blogerlar obunachilar faol bo‘lishida. O‘qituvchilar ta’lim sifati oshishida. Onalar farzandining muvaffaqiyatida.

Ammo faqat bir sohada kam narsa bilib umumiy xulosa qilish xato. Muammolar kompleks yechimlar talab qiladi.

Bunda bizga *multitasking fikrlash kerak.

*Multitasking fikrlash- bir muammoni bir nechta tomondan ko‘ra olish.

Ba’zi birodarlarimiz faqat din tomondan fikrlab, ba’zan dunyoviy ilmlarni unutib qo‘yishadi, ba’zan esa rad etishadi. Lekin me’yorni ushlagan ma’qul menimcha.

Ko‘proq turli sohalarga oid kitoblar o‘qing. Turli fikrlashga ega odamlar bilan suhbatlashing. Muammolarga turli tarafdan qarashni o‘rganasiz.

Faqat bir tomonlama fikrlab o‘zingizni ham, yaqinlaringizni ham qiynab qo‘yishingiz mumkin.

@inomraximov

Tanlovda aldanib qolmang

Uzun yo‘llarni tanlang, har qanday ishda hayot qisqa yo‘llarni kechirmaydi. © Taleb Nassim

Istalgan ishni boshlayotganimizda bizda tanlov bo‘ladi. Biror narsaga oson yo‘l qidirib, eplamachilik qilish yoki qadrli bo‘lgan bilim va tajribani olish. Biz aqlli, dindor, boy ko‘rinishimiz oson, aslida unday bo‘lmasak-da. Bu qisqa yo‘l.

Bir kitobni o‘qivolib aqllilik qilish boshqa, bir ma’lumotni turli tomondan qarab, tekshirish va mos odamga gapirish boshqa.

Ikki-chi oyda dori ichvolib shishib ketish boshqa, yillab shug‘ullanib chiroyli qomatni qurish boshqa.

Firmani ochib qo‘yib “men faunderman” deyish boshqa 20 yil bir sohada ishlab tajriba orttirib “biz oddiy sotuvchimiz” deyish boshqa.

Qisqa yo‘lda tez natijaga boramiz. Lekin yiqilish ham tez va qattiq bo‘ladi. Biz sog‘lig‘imizni yo‘qotishimiz, o‘zimizni aldab qo‘yishimiz mumkin.

Uzun yo‘llar esa qadrli bo‘ladi. U sizga haqiqiy ilm, sog‘liq, hurmat olib keladi. Bu yo‘l qiyinroq, lekin qiymati uzoq muddatda keladi va qiyinchilikka arziydi.

Qisqa yo‘llarga aldanmang. Hurmat qiladigan insonlaringizga qarang, qiyinchilik ko‘rgan bo‘ladi.

Uzun yo‘llarni tanlang, vaqtlar o‘tib o‘zingizga rahmat aytasiz.

@inomraximov

Bobongni gapiga quloq sol!

Tepadagi pastdagini biladi, pastdagi tepadagini bilmaydi. © Rene Daumal

1) Yoshi katta yaqinlarimiz maslahat berishganda, ular ham bizdek 20 yosh bo‘lishganini, bu muammolarni ko‘rib, yechib o‘tishganini unutma.

Biz nimalarni o‘ylayotganimizni, nimalarni yaxshi ko‘rishimizni, kallamiz yaxshi ishlamasligini ular yaxshi bilishadi. Chunki ular tepada. Bu yo‘llardan o‘tib ketishgan.

Shuning uchun ularni tinglash va maslahatlariga amal qilish bizga juda katta foyda beradi.

Ular nimaniyam bilishardi demang. Siz yangi texnologiyalarda zo‘rdirsiz, lekin ular hayotiy masalalarda ko‘p narsani bilishadi. Texnologiyalar o‘zgaraveradi, insonlar esa o‘zgarmaydi.

2) O‘zi aqli yetmaydigan narsalarga aqlim yetmaydi deyish uchun insonga hikmat kerak bo‘ladi.

Oxirgi marta qachon eshitdingiz jamiyat muammolari haqida gapirishdan tiyilib, “bunga fikr bildirmayman hali aqlim yetmaydi, o‘rganishim kerak” degan insonni? Yo‘q, bizda hamma hamma narsani biladi... Shundaymi?

Oddiy shifokor isitmasi bor kasalga oddiy tabletka buyurishi mumkin. Tajribali shifokor esa isitma 200 dan ortiq kasalliklarning alomati ekanini biladi va qo‘shimcha tekshiruvlar o‘tkazib, keyin xulosa qiladi.

Aniq gapirish endi boshlaganlarni ishi. Haqiqiy mutaxassislar esa hamma narsa ularni qo‘lida emasligini bilishadi.

Gapirishga, yomonlashga, xulosa qilishga shoshilmang, o‘qib-o‘rganishga shoshiling.

Bu tavsiyalar o‘zimga ham kerak. Blogni ham faqat aql o‘rgatish uchunmas, birga rivojlanish uchun ochganman.

@inomraximov

Foydali postlarni ulashib turish kerak.

Mabodoga aytib qo‘yyapman-da ))

Xohlamasang qilolmaysan

Agar xohlasangiz-u, lekin bajara olmasangiz, demak chin dildan xohlamayapsiz. © Mark Tven

Maqsadlari katta, lekin tayinli nimadir qilolmayotgan tanishlaring bor. O‘zingda ham bo‘lgandir bu holat.

Shu paytda o‘ylab ko‘rish kerak. Aslida shu narsani haqiqatdan xohlaymanmi?

Ustozlar biror katta ishni boshlashdan oldin uni xohlash, foydali tomonlarini tushunib olish kerakligini aytishadi.

Xohish kuchli qiziqishni uyg‘otadi va qiziqqan ishing sen uchun osonga aylanadi. Ko‘p ishlasang ham charchamaysan. Ichingdagi kuchli xohish ishlashga majburlayveradi.

Shu orqali qiziqqan ishingda qiziqmasdan ishlayotganlardan oson o‘tib keta olasan.

Shuning uchun xohlab olish va qiziqqan narsangni topishga oylar, yillar sarflasang arziydi.

@inomraximov

Ish ko‘p umr qisqa

Hamma maqsadlaringni yoz, uchta eng kerakligini qoldir, qolganlarini o‘chirib tashla va umringni oxirigacha eslama. © Warren Buffett

Aslida hayotimiz davomida 3-4 ta ishni qoyilmaqom qilib eplab qo‘ysak yetarli. Juda ko‘p maqsadlar bo‘lishi, odamni chalg‘itishi mumkin.

Foydali va daromadli kasb egallasang, ota-ona xizmatida bo‘lsang, yaxshi oila qura olsang, yaxshi farzand tarbiya qilsang va  boshqalarga kerakli inson bo‘lsang. Bundan ortiq nima kerak bo‘lishi mumkin?

Har bitta maqsad bizdan energiya talab qiladi. Energiyani ko‘paytira olmasligimiz mumkin lekin uni kerakli maqsadlarga to‘g‘ri sarflasak natija degan narsa tezroq keladi. Ortiqcha narsalarni olib tashlash kerak.

Qadrli vaqtingni qadrsiz narsalarga sarflama. Aslida nima zarurligi, nima ortiqchaligi va baribir hamma  narsaga ulgura olmasliging haqida o‘ylab ko‘r!

@inomraximov

Gapirsang kamayishi mumkin

Obro‘ni saqlab qolish uchun gapirilgan gap obro‘ni ketkizadi. © Taleb Nassim

Insonlar o‘z obro‘larini saqlab qolish uchun ko‘p ishlar qilishadi. Misol uchun boshqalarni yomonlab yuborish, yolg‘on gapirish, men qilmadim deyish, bir-biri bilan bahslashib yurish.

Obro‘ o‘zi nima? Obro‘ bu - boshqalarning siz haqingizda nima deyishi, o‘ylashi. Sizni siz haqingizdagi fikringiz emas.

Obro‘yimiz o‘zimizni o‘zimiz emas, boshqalar bizni maqtaganda ko‘tariladi.

Hech bir olim yoki dunyo tanigan inson o‘zini zo‘rman demagan. Balki uni atrofdagilar e’lon qilishadi, tan olishadi.

Obro‘ni nima ko‘taradi? Qilayotgan ishlarimiz, ko‘rsatgan natijalarimiz, gaplarimizga mosligimiz, va’dada turishimiz, yaxshi inson bo‘lishimiz.

Agar gapirmasdan obro‘ni saqlayolmayotgan bo‘lsang, demak u baland emas ekan.

Ko‘proq mehnat qil, natijalaring sen uchun gapirsin!

@inomraximov

Finishga hali bor

Sinfdoshim baholari bilan maqtanaverar edi. Baho poygasida yutish zavq berar edi.

Litseyda kursdoshlarim qizil diplom uchun rosa talashishgan edi. Olganlar olmaganlardan o'zlarini ustun ko’rishgandi.

Institut birinchi kursidan ba’zilarda mashina bor edi. Kursdagilar omadli deb bilishardi ularni.

Sinfdoshimga baholari yordam bermadi. Ishini topa olmayapti. Kursdoshlarimga diplomlari yordam bermadi, sohalari o’zgarib ketdi. Institutdoshlarimga mashinalari yordam bermadi, ishga oluvchiga bu umuman muhim emas.

Birga katta bo’lganlaringiz orasidan, kimdur birinchi turmush quradi. Mashina oladi. Katta pul topishni boshlaydi. Atrofdagilar solishtiradi. Sizdan ham kuta boshlashadi.

Siz o’qiyotgan bo’lasiz. Tajriba orttirayotgan bo’lasiz. O’tib ketayapti deb chalg’ish boshlanadi. O’zingizni yomon his qilasiz.

Agar vaqtingizni bekor o’tkazmayotgan bo’lsangiz - e’tibor bermang. O’z ustingizda ishlayvering. 30 yoshga to’lmaguncha mevalar terilmaydi.

Holatingizni boshqalarga solishtirmoqchi bo’lganlarga esa meni gapimni yetkazing: finishga hali bor.

© Aziz Rahimov

@inomraximov

Havas seni o‘stiradi

Sen hasad qilishing yoki qiziqishing mumkin. Ikkinchisi seni o‘stiradi. © Alex Hormozi

Hasad yoki qiziqish. Buni o‘zimizning tilda hasad va havasga o‘xshatsak bo‘ladi.

Havas - sizdayam bo‘lishini xohlashingiz va uning natijasiga quvonish.

Hasad - unda bo‘lmasligini xohlashingiz va u arzimasdi deb o‘ylashdir.

Sizdan boyroq, omadliroq, mashinasi qimmatroq, obunachisi ko‘proq, ishi zo‘rroq, hayoti, bilimi yaxshiroq tanishingiz bor deylik, bunda:

Yomon pozitsiya: Nimaga menda yo‘q? U bularga arzimasdi deb nolish.

Bu o‘zimizga zarar. Hasad xuddi ichimizdan oqayotgan  kislotaga o‘xshaydi. Tomoqni biroz ho‘llaydi-yu keyin ichni yemiradi.

Yaxshi pozitsiya: Bu narsaga qanday erishdi? Qiziqish! Kerak bo‘lsa borib o‘zidan so‘rash. Yaqinlar natijasiga quvonish. Bizga ham nasib qilsin deb maslahatlar so‘rab olish.

Menga yordam bermaydi demang. Oldindagi odamlar orqadagilarni  tortishni xohlashadi.

Hasad havasga almashtirilsa, xotirjamlik va harakatchanlikka olib keladi.

Havas qilishni o‘rganing!

@inomraximov

O‘rganish = o‘zgarish

O‘rganish bu - bir xil vaziyatda keyingi safar o‘zini boshqacha tutish. © Dc Trever Keyshia

O‘rganish bu diplom olish, kitob o‘qish yoki video ko‘rish emas. O‘rganish bu - o‘zgarishdir.

Blogim boshida obunachi va like’lar soni qiziq tuyula boshlagandi. Lekin aslida tanqidiy izohlar eng keragi ekanligini tushundim. Buni hech kim aytmadi, lekin o‘rgandim.

Biz kuzatish, tahlil qilish va sinab ko‘rish orqali tez o‘rganamiz va o‘zgaramiz.

O‘rganish usullari juda ko‘p. Natijasi esa o‘zgarish bilan belgilanadi.

Biror narsani bildim deganing, o‘rgandim deganing emas. Bu narsa amalda ko‘rinishi kerak.

Qilolmayapsanmi? Demak, o‘rganmagansan hali.

Tez o‘rganmoqchimisan? Tez o‘zgarishga, yangi va o‘zing qo‘rqqan narsalarni qilib ko‘rishga harakat qil.

Misol uchun blog och va chellenjlar qil!

@inomraximov

Qulaylikmi yoki qaramlik?

Siz xo‘jayinlik qilgan narsalar sizga xo‘jayinlik qilish bilan tugaydi. © Pavel Durov

Dastavval hayotimizni yengillashtirish uchun xaridlar qilamiz. Keyin xaridlar bizni boshqa xaridlarga undaydi va bizdan ortiqcha mablag‘/kuch/vaqtni oladi.

MacBook olasiz, keyin unga mos tushgani uchun iWatch olasiz. Unga mos tushadigan  iPad va iPhone ham olasiz.

Yoki bitta chiroyli oyoq kiyim olasiz va unga mos qilishni xohlab butun boshli kiyim qib qo‘yganingizni sezmay qolasiz.

Shu tarzda bir narsa ortidan boshqa narsalarni yetaklab kelib reja qilganingizga nisbatan ancha ko‘p mablag‘ sarflaysiz.

Ikkinchidan bizni hayotimizni soddalashtirib qulayligimiz uchun yaratilgan ko‘p narsalar vaqtimizni sarf qilib bizni band qilib qo‘ymoqda.

Qulayroq yashash va vaqt tejash uchun zamonaviy сенсорный telefon olasiz, u esa sizni vaqtingizni ko‘proq olishni boshlaydi.

Yangi mashina esa sizdan ortiqcha e’tibor va qo‘shimcha xarajatlarni talab qiladi.

Buyumlarga ko‘p e’tibor berib yubormang. Ular sizga xizmat qilishi kerak!

@inomraximov