ҲОЛАТ

Сочи узун мажнунтол,
Мендан битта сўра ҳол.
Иккимиз ҳам бир телба,
Дийдор кутаман бежол.

Сойнинг суви югурик,
Иккимиз ҳам бош эгик.
Ёр бунча ҳам бағритош,
Айт, ёрга не сўз дедик?

Ўхшатмасдан учрамас,
Иккаламиз бирга маст.
Икки ошиқ- бир мискин,
Санам қилдиму ё қасд?

Сенинг толангда нола,
Менинг ноламда тола.
Эшитмаса ёр дардим,
Қилгум сенга ҳавола.

Сой бўйида қўш ғариб,
Кутишдан турар ҳориб.
Сувга ташлай арзимни
Хабар берсин у бориб.

Неча йилки шу ҳолат:
Зор айлади муҳаббат.
Сен сойга тикиласан,
Шеър ёзаман мен фақат.

Тунни кунга улай ман,
Сен боринга ўлай ман.
Майли, ғариб, беозор
Бир япроғинг бўлай ман.

@farmontosh
2025 йил 25 февраль.