Aytish joizki, O'zbekiston hali ham JST a'zosi emas, JSTga kirgunimizcha tashkilot ham yo'q bo'lib ketishi hech gap emas. Boz ustiga ko'pgina savdo masalalarida eng yopiq, eng qiyin mamlakatlar qatoridamiz, savdo va investitsiyalar bundan ham qiyin bo'lishni xohlayotganlarni tushunishim qiyin bo'lyapti. Normal mamlakatlar ichida, bizdan xalqaro savdoga yopiqroq joylar bormi o'zi? Shundoq ham, tabiatan dengizlardan uzoqmiz, tabiatan katta iqtisodiy markazlardan uzoqda joylashganmiz, bizni undan ham chetroq burchakda bo'lishimiz - katta muammo bo'ladiku. Odatda, savdo va investitsiyalarni cheklash bu bir jazo - "sanksiya" deyiladi. Agar deylik AQSh yoki Xitoy o'z tadbirkorlariga O'zbekistonda tijorat qilishga yoki investitsiya kiritishga taqiq qo'ysa - bu yomon narsa bo'lar edi. Rossiya urush qilgani uchun, unga qarshi bu chorani jazo tariqasida ayrim mamlakatlar qo'llashdi. Biz esa, o'zimiz o'zimizga sanksiya kiritmoqchi bo'lganlardek gapirmoqdamiz. Ya'ni "kelmasin xorijlik tadbirkorlar" deb.

Shundoq ham chetdan keladigan investitsiyalar boʻyicha orqada qolgan davlatlardanmiz. Shundoq ham turli sabablarga koʻra Oʻzbekistonda katta xorijiy korxonalar faoliyat yuritishga ham, sarmoya kiritishga ham unchalik qiziqmaydi. Texnologik taraqqiyot bobida ham ancha kechikkanmiz, shu bois rivojlangan o‘lkalardan texnologiya yoki investitsiya kirsa xursand bo‘lishimiz kerak. Agar oʻz qozonimizda oʻzimizni qaynatib, chegaralarni berkitsak va proteksionizm ko'lmagimizda qolib ketaversak - xavfsizlik nuqtai nazaridan ham juda qiyin ahvolda bo'lib qolamiz. Irqchilik esa har holda yomon narsa. Dunyo juda keng va u nol-summa oʻyini emas: kimdir foyda koʻrsa, boshqasi zarar koʻrishi shart emas. Dunyodagi qiymat cheklanmagan.

https://t.me/uzbekonomics/1149