АДАШДИМ

Билмам, қайси кезда адашдим,
Баҳор ўтиб, кузда адашдим.
Кулиб туриб ёлғон сўзлаган -
Қаро-қаро кўзда адашдим.

Сендан ўзга бўлмайди деган,
Сенсиз кўнглим тўлмайди деган.
Сен-ла бахтим сўлмайди деган -
Ўшал ширин сўзда адашдим.

Жоним, қўйгин ёлғонларингни,
Ёлғон "оҳ"у, фиғонларингни.
Билдим қайда қолғонларингни...
Сен адашган изда адашдим.

Ўзимданам тонганим билан,
Қадрим йўқдир, қалбимда тикан.
Эримади, ёнганим билан -
Қалбингдаги музда адашдим.

Қисқа экан муҳаббат фасли,
Меҳрга зор одамзот насли.
Кўнгил эмас, жоним, мен асли -
Манглайдаги тузда адашдим...

БОБУР БОБОМУРОД

@bobur_bobomurod